„თითო ქულას დიდი მნიშვნელობა აქვს“ - შერმადინი დარუშაფაკასთან მატჩზე

ხვალ, გიორგი შერმადინის „ლენოვო ტენერიფე“ ჩემპიონთა ლიგაზე ჯგუფური ეტაპის მეოთხე ტურის შეხვედრას გამართავს. ქართველი კალათბურთელის გუნდი საკუთარ მოედანზე თურქულ „დარუშაფაკას“ დაუპირისპირდება.

შეხვედრამდე ერთი დღით ადრე, გიორგი შერმადინი „ტენერიფეს“ პრესსამსახურს მოახლოებულ მატჩზე ესაუბრა.

გიორგი შერმადინი:

ჩვენი მეტოქე ძალიან კარგი და ათლეტური გუნდია. კარგ კალათბურთს თამაშობენ და კორტს მშვენივრად მართავენ. ამ თამაშში მთავარი დაცვა იქნება, მათი კონტრშეტევები უნდა შევაჩეროთ და კონცენტრირებულად უნდა ვითამაშოთ.

ეს მატჩი საკმაოდ მნიშვნელოვანია, რომ ჯგუფში პირველი ადგილი დავიკავოთ. ამ მოკლე ფორმატში, ყველა გამარჯვებას და თითო ქულას დიდი მნიშვნელობა აქვს. საკუთარ არენაზე, ჩვენი გულშემატკივრის მხარდაჭერით მაქსიმუმი უნდა გავაკეთოთ. თურქეთში, პირველი მატჩი 4 ქულით წავაგეთ და ახლა ყველაფერი სასიკეთოდ უნდა დავასრულოთ.

შეგახსენებთ, რომ საკალათბურთო ჩემპიონთა ლიგის სატურნირო ცხრილში „ლენოვო ტენერიფეს“, „დარუშაფაკას“ და ფრანგულ „შოლეს“ თანაბარი, 5-5 ქულა აქვთ და პირველ-მეორე-მესამე ადგილებს ინაწილებენ. ტენერიფესა და „დარუშაფაკას“ შეხვედრა 21 ნოემბერს, საქართველოს დროით 23:55 საათიდან დაიწყება.