„საკმარისია!“ - რა მოხდა ნაპოლისა და ემპოლის მატჩის შესვენებაზე

იტალიის სერია A-ს მე-12 ტურში, ხვიჩა კვარაცხელიას „ნაპოლი“ საკუთარ კედლებში „ემპოლის“ დაუპირისპირდა. „პარტენოპეიმ“ ცუდი თამაში აჩვენა და უმაღლეს დივიზიონში ადგილის შესანარჩუნებლად მებრძოლ გუნდთან მინიმალური ანგარიშით დამარცხდა - 0:1.

მატჩის დასრულების შემდეგ, იტალიურ პრესაში დაიწერა, რომ „პარტენოპეის“ პრეზიდენტი, აურელიო დე ლაურენტისი საკუთარი გუნდის თამაშით განრისხებული იყო და შესვენებაზე გასახდელში ჩავიდა. Tuttosport-ის დღევანდელ ნომერში სწორედ გასახდელში განვითარებულ მოვლენებზეა საუბარი.

„გასავარდნ ზონაში მყოფ გუნდთან, რომელსაც მხოლოდ 4 გოლი ჰქონდა გატანილი, 0:0 დასრულებული სამარცხვინო პირველი ტაიმის შემდეგ, კლუბის პრეზიდენტი გასახდელში სწრაფად ჩავიდა. „საკმარისია!“ - განაცხადა განრისხებულმა დე ლაურენტისმა და ამას მოჰყვა ხმამაღალი შეძახილები და ყვირილი, რომელთა მსგავსიც, მისი მხრიდან წინა თვეებში არც ერთხელ ყოფილა“, - წერს იტალიური გაზეთი.

ცნობისთვის, Il Mattino-ს ინფორმაციით, დე ლაურენტისი ახალ თავკაცს ეძებს და ანტონიო კონტეს კიდევ ერთხელ დაუკავშირდა, მაგრამ მისგან თავაზიანი უარი მიიღო. ამ მომენტისთვის, მისი ნომერ პირველი სამიზნე იგორ ტუდორია და „მარსელის“ ყოფილ მთავარ მწვრთნელს წინადადებით მიმართა.