შენგელიას 12 ქულა | ვირტუს ბოლონია რეალთან განადგურდა
თორნიკე შენგელიას „ვირტუს ბოლონიას“ 5-მატჩიანი წაუგებელი სერია, რომელიც იტალიურ კლუბს ევროლიგაზე ჰქონდა, მადრიდის „რეალთან“ შეწყდა. „ვირტუს ბოლონია“ „რეალს“ სტუმრად დაუპირისპირდა და 74:100 განადგურდა.
„ვირტუს ბოლონიამ“ მრისხანე მეტოქეს წინააღმდეგობა მხოლოდ პირველ მეოთხედში გაუწია, რომელიც 27:26 მოიგო. მასპინძლებმა მეორე პერიოდში 27:10 იმარჯვეს, მეორე ნახევარში კი მეტოქეზე 10-ით მეტი ქულა ჩააგდეს და სასურველი შედეგის დაფიქსირება არ გასჭირვებიათ.
SCONFITTA ❌
— Virtus Segafredo Bologna (@VirtusSegafredo) November 9, 2023
Prima sconfitta europea in trasferta a casa dei Campioni in carica per la Segafredo
???? Belinelli 15, Shengelia 12, Hackett 9, Dunston 9, Mickey 8, Cordinier 7, Smith 7, Dobric 5, Pajola 2#AmarsiAncora pic.twitter.com/bHIP0K0cHr
შენგელიამ მატჩი ძირითად შემადგენლობაში დაიწყო და პარკეტზე 29 წუთი და 45 წამი გაატარა. ქართველმა კალათბურთელმა აქტივში 12 ქულა, 6 მოხსნა (2 მეტოქის ფარზე), 4 შედეგიანი გადაცემა, 1 ჩაჭრა და 1 დაფარება ჩაიწერა. შენგელიამ 7-დან 4 ორქულიანი და 4-დან 4 საჯარიმო ჩააგდო, 3 სამქულიანი კი გააცუდა. „ვირტუს ბოლონიას“ მაისურით მასზე მეტი ქულა მხოლოდ მარკო ბელინელის ჰქონდა - 15.
ცნობისთვის, ევროლიგაზე შენგელიას გუნდს 5 მოგება და 2 წაგება აქვს და სატურნირო ცხრილში მე-4 პოზიციას იკავებს. „ვირტუს ბოლონიას“ მომდევნო მატჩი 11 ნოემბერს ელის და „ტრევიზოს“ დაუპირისპირდება.
