3-წლიანი დისკვალიფიკაცია | ფიფამ რუბიალესი დასაჯა

ესპანეთის ფეხბურთის ასოციაციის ყოფილმა პრეზიდენტმა, ლუის რუბიალესმა ფიფასგან მკაცრი სასჯელი მიიღო. მსოფლიო ფეხბურთის მმართველმა ორგანომ ოფიციალური განცხადება გაავრცელა და რუბიალესი ფეხბურთთან დაკავშირებულ ნებისმიერ საქმიანობას 3 წლით ჩამოაშორა.

„ფიფას დისციპლინურმა კომიტეტმა ლუის რუბიალესი ფეხბურთთან დაკავშირებული საქმიანობებიდან, როგორც ადგილობრივ, ისე საერთაშორისო დონეზე, 3 წლით მოკვეთა. ეს ფიფას ქალთა მსოფლიო ჩემპიონატის ფინალის შემდეგ მომხდარს უკავშირდება, რომლის გამოც, თავდაპირველად, ბატონმა რუბიალესმა 90-დღიანი დისკვალიფიკაცია მიიღო.

რუბიალესს გადაწყვეტილების შესახებ შევატყობინეთ და 10 დღე აქვს, რათა მოითხოვოს მიზეზის გასაჯაროება თუ რამ განაპირობა ეს ვერდიქტი. ასევე, მას შეუძლია, გადაწყვეტილება ფიფას სააპელაციო კომიტეტში გაასაჩივროს“, - ნათქვამია განცხადებაში.

შეგახსენებთ, რომ ქალ ფეხბურთელთა მსოფლიო ჩემპიონატის ფინალში ესპანეთის ნაკრებმა ინგლისს მინიმალური სხვაობით, 1:0 მოუგო, დაჯილდოების ცერემონიაზე კი ესპანეთის ფეხბურთის ფედერაციის უკვე ყოფილმა პრეზიდენტმა, ლუის რუბიალესმა ნაკრების ფეხბურთელ ჯენიფერ ერმოსოს ტუჩებში აკოცა, რასაც საერთაშორისო სკანდალი მოჰყვა. საბოლოოდ, რუბიალესს პრეზიდენტის თანამდებობის დატოვება მოუწია.