კარგი ამბავი - ხოჭოლავა დაბრუნდა და მიდტიულანდთან ითამაშა

„კოპენჰაგენის’’ ქართველმა ცენტრალურმა მცველმა დავით ხოჭოლავამ ხანგრძლივი სარეაბილიტაციო კურსი დაასრულა, მოედანს დაუბრუნდა და გუნდთან ერთად ემზადება. მასთან ერთად დანიურ კლუბს ანდრეას კორნელიუსი დაუბრუნდა, რომელიც ასევე ტრავმირებული იყო.

სანაკრებო  პაუზისას Future Cup-ის ტურნირი იმართება. „მიდტიულანდთან’’ შეხვედრაში ხოჭოლავა სასტარტო 11-ეულში მოხვდა. ხოჭოლავას დაბრუნება კარგი სიახლეა, მაღალი დონის მცველია და საქართველოს ეროვნულ ნაკრებში პრობლემურ პოზიციაზე მნიშვნელოვანი როლის შესრულება შეუძლია.

დანიის სუპერლიგის მომდევნო ტურში „კოპენჰაგენი'' „ვაილეს'' მიიღებს (21 ოქტომბერი), შემდეგ კი ჩემპიონთა ლიგის ჯგუფურ ეტაპზე „მან. იუნაიტედს'' „ოლდ ტრაფორდზე'' დაუპირისპირდება (24 ოქტომბერი). შესაძლოა, ხოჭოლავამ „მან. იუნაიტედთან'' ითამაშოს.

შეგახსენებთ, გასულ სეზონში, აპრილში, დავით ხოჭოლავამ მენისკის ოპერაცია გაიკეთა და ხანგრძლივი სარეაბილიტაციო კურსი გაიარა. 

30 წლის ცენტრალურმა მცველმა, რომელსაც კლუბთან კონტრაქტი 2025 წლის ივნისამდე აკავშირებს, 2021 წლის ზაფხულიდან მოყოლებული „კოპენჰაგენში'' 62 მატჩი ჩაატარა, 2 გოლი შეაგდო და 1 საგოლე პასი შეასრულა.

ხოჭოლავა „კოპენჰაგენთან'' ერთად დანიის ჩემპიონი გახდა (2021-22, 2022-23) და დანიის თასი მოიგო (2022-23).