მამუს მცირე სათამაშო დრო და სამი ქულა | სან ანტონიოს მარცხი ჰიუსტონთან
სანდრო მამუკელაშვილის „სან ანტონიო სპურსი“ რეგულარული სეზონისთვის მზადებას განაგრძობს. „მაიამი ჰიტთან“ მოგებული მატჩის შემდეგ, გრეგ პოპოვიჩის ბიჭები „ჰიუსტონ როქეთსს“ დაუპირისპირდნენ და 89:99 დამარცხდნენ.
მამუკელაშვილს მცირე სათამაშო დრო მიეცა. სანდრომ პარკეტზე 8 წუთი და 45 წამი გაატარა და 3 ქულას დასჯერდა. „მამუმ“ 2-დან 1 სამქულიანი ჩააგდო და 1 ორქულიანი გააფუჭა. მის პასივში 1 პერსონალური ჯარიმა იყო.
„სან ანტონიოს“ რიგებში ყველაზე მეტი, 18 ქულა ზაკ კოლინსის ანგარიშზეა. ჯერემი სოხანმა 13 ქულა დააგროვა, კელდონ ჯონსონმა - 11. „ჰიუსტონს“ 15-15 ქულით კემ უაითმორმა და ამენ ტომპსონმა ულიდერეს, ფრედ ვანვლიტსა და აარონ ჰოლიდეის კი 12-12 ქულა ჰქონდათ.
ცნობისთვის, NBA-ის რეგულარული სეზონის დაწყებამდე, „სან ანტონიო“ კიდევ ორ მოსამზადებელ მატჩს გამართავს. 19 ოქტომბერს, „სპურსი“ „ჰიუსტონ როქეთსს“ კიდევ ერთხელ დაუპირისპირდება, 21 ოქტომბერს კი „გოლდენ სტეიტ უორიორსს“ შეხვდება.
