გიჟური ფინალი - ჟირუს „სეივმა“ მილანს ჯენოასთან მოაგებინა

იტალიის სერია ა-ს მე-8 ტურში „ჯენოა’’ შინ „მილანთან’’ 0:1 დამარცხდა, რითაც სატურნირო ცხრილის სათავეში სტეფანო პიოლის გუნდი სეზონში პირველად მოექცა.

გენუაში გამართულ მატჩში გამარჯვების გოლი კრისტიან პულიშიჩმა 87-ე წუთზე შეაგდო, საგოლე პასი იუნუს მუსას ანგარიშზეა.

მეორე ტაიმის მე-9 დამატებულ წუთზე არბიტრმა მოედნიდან მაიკ მენიო გააძევა. „მილანს’’ ცვლილებების ლიმიტი ამოწურული ჰქონდა, „მილანის’’ კარში ოლივიე ჟირუ ჩადგა, რომელმაც საოცარი რეფლექსები გამოავლინა და გუნდს 3 ქულის მოპოვებაში დაეხმარა.

ამ შეხვედრაში კიდევ ერთი საინტერესო ფაქტი მოხდა, მე-13 დამატებულ წუთზე „ჯენოას’’ მეკარე ხოსეპ მარტინესი გააძევეს, რომელიც შეტევაში იყო გადასული. ასე რომ, მსაჯის მიერ დამატებულ დროში მსაჯმა ორივე გუნდის მეკარე გააძევა.

როგორც აღვნიშნეთ, „შავ-წითლებმა'', ამ გამარჯვებით, სატურნირო ცხრილის სათავეში გადაინაცვლეს - თანაქალაქელ „ინტერს'', რომელმაც „ბოლონიასთან'' (2:2) ვერ მოიგო, 2 ქულით გაუსწრეს.

„მილანის'' მეკარე მაიკ მენიო ორ მნიშვნელოვან თამაშს გამოტოვებს, „მილანს'' „იუვენტუსთან'' საშინაო და „ნაპოლისთან'' გასვლით შეხვედრებში ვერ დაეხმარება. გარდა ამისა, ყვითელი ბარათების გამო, ტურინელებთან ტეო ერნანდესიც არ იქნება.