„მჯერა, შესანიშნავი სეზონი ექნება“ | რა თქვა ძოლამ ნაპოლიზე და კვარაზე

ლეგენდარულმა იტალიელმა ფეხბურთელმა, ჯანფრანკო ძოლამ „ნაპოლიზე“ ისაუბრა. ძოლა ნეაპოლელთა ასპარეზობას Sky Sports-ის ეთერში გამოეხმაურა და „პარტენოპეის“ ქართველი შემტევის, ხვიჩა კვარაცხელიას სათამაშო ფორმასთან დაკავშირებით, საკუთარი პოზიცია დააფიქსირა.

„შედარებების გაკეთება ჯერ ნაადრევია. როდესაც ცვლი მთავარ მწვრთნელს, რომელსაც გუნდზე გავლენა ჰქონდა, ახალ თავკაცს დრო სჭირდება, რათა საკუთარი იდეები პრაქტიკაში გადაიტანოს. ნაპოლი სეზონის სტარტზე კარგად ნამდვილად არ გამოიყურება.

ხვიჩა კვარაცხელიას რაც შეეხება, ბედნიერი ვარ, რომ ნეაპოლში დარჩა და წელი, რომლის დროსაც, ფეხბურთელს თავისი სტატუსის ხელახლა დამტკიცება უწევს, ყველაზე ძნელია. მეტოქეებმა იგი უკეთ შეისწავლეს და ეს ყველაფერს ართულებს. კვარაცხელიასთვის ფუნდამენტური წელი იქნება და იგი შესანიშნავ სეზონს ჩაატარებს. ამის მჯერა“.

შეგახსენებთ, რომ „კვარას“ მიმდინარე სეზონში მხოლოდ 1 საგოლე გადაცემა აქვს გაკეთებული. „ნაპოლის“ სამი მატჩია არ მოუგია და სერია A-ს 5 ტურის შემდეგ, მე-7 პოზიციაზე იმყოფება. „პარტენოპეის“ 8 ქულა აქვს და მომდევნო მატჩი საკუთარ კედლებში, 3 ქულის მქონე „უდინეზესთან“ ელის.