წარუმატებლობა გრძელდება - საქართველო ნორვეგიასთან დამარცხდა

ევროპის ჩემპიონატის საკვალიფიკაციო ეტაპის მორიგ ტურში საქართველო ნორვეგიას სტუმრად დაუპირისპირდა და უშანსოდ 1:2 დამარცხდა.

მთელი მატჩის განმავლობაში მასპინძლები დომინირებდნენ. ნორვეგიელები მომენტს მომენტზე ჰქმნიდნენ. ანგარიში 25-ე წუთზე ერლინგ ჰოლანდმა გახსნა. „სიტის“ თავდამსხმელი საჯარიმოში ყველაზე მაღლა ახტა და თავური დარტყმით გაიტანა.

სოლბაკენის შეგირდები ამაზე არ გაჩერდნენ. აღსანიშნავია ნუსას აქტიურობა. ახალგაზრდა შემტევმა თითქმის ყველა დრიბლინგი წარმატებით დაასრულა და ორი საგოლე პასი მიითვალა.

მეორე გოლი კი მარტინ ოდეგორის ანგარიშზეა. „არსენალის“ ნახევარმცველმა შორიდან გაისროლა და მამარდაშვილს შანსი არ დაუტოვა.

მატჩის მიწურულს, ბუდუ ზივზივაძემ ეფექტური გოლით სხვაობა მინიმუმამდე შეამცირა. სამწუხაროდ, საქართველოს დრო აღარ ეყო და დამარცხდა.

შეგახსენებთ, ამ მატჩის შემდეგ, „ჯვაროსნებს“ სატურნირო ცხრილში 4 ქულა დარჩათ და ბოლოსწინა ადგილზე იმყოფებიან. სანიოლის გაწვრთნილი ნაკრები შემდეგ მატჩს 15 ოქტომბერს, საკუთარ კედლებში „კვიპროსის“ წინააღმდეგ გამართავს.