შურისძიება უნდათ | აშშ-ს ნაკრები ოლიმპიადაზე სუპერ შემადგენლობით მიდის
მსოფლიოს საკალათბურთო ჩემპიონატზე განცდილი ფიასკოს შემდეგ, დიდი შანსია, აშშ-ს ნაკრებმა ოლიმპიადაზე უძლიერესი შემადგენლობით იასპარეზოს. 2024 წლის ზაფხულში, ოლიმპიურ თამაშებს პარიზი უმასპინძლებს და გავლენიანი ჟურნალისტის, შემს ჩარანიას ინფორმაციით, ტურნირზე მონაწილეობის მიღებას სუპერვარსკვლავები აპირებენ.
ჩარანიას მიხედვით, ლებრონ ჯეიმსი, სტეფ კარი, კევინ დურანტი, ენტონი დევისი და ჯეისონ ტეიტუმი მზად არიან, თავიანთი ნაკრების ღირსება დაიცვან. მათ გარდა, ოლიმპიადაზე თამაშით სერიოზულად არიან დაინტერესებული დევინ ბუკერი, დემიენ ლილარდი, დიაარონ ფოქსი და კაირი ირვინგი.
Sources: LeBron James wants to represent Team USA at 2024 Paris Olympics and is spearheading group of future Hall of Famers – including Stephen Curry, Kevin Durant – prepared to commit.
— Shams Charania (@ShamsCharania) September 11, 2023
Full details with @joevardon at @TheAthletic: https://t.co/r2XGO3E2TO
აშშ-ს ნაკრებმა მსოფლიო ჩემპიონატზე მედლებიც ვერ აიღო და ტურნირი მეოთხე ადგილზე დაასრულა. ამერიკელები ნახევარფინალში გერმანიასთან 2 ქულით დამარცხდნენ, 111:113, მესამე ადგილისთვის ბრძოლაში კი კანადასთან წააგეს. აშშ მოქმედი ოლიმპიური ჩემპიონია და როგორც ჩანს, მედლების დაცვისთვის სერიოზულად ემზადებიან.
ცნობისთვის, აშშ-ს ოლიმპიადაზე ოქროს მედლები ზედიზედ 4-ჯერ აქვს მოგებული. ბოლოს მათ წარუმატებლობა 2004 წელს იწვნიეს, როცა მანუ ჯინობილისა და ლუის სკოლას არგენტინასთან დამარცხდნენ.
