ნიკა ამაშუკელი მსოფლიო თასის ჯგუფურ ეტაპზე 7 თამაშს იმსაჯებს

მსოფლიო რაგბმა 2023 წლის მსოფლიო თასის ჯგუფური ეტაპის 40 მატჩისთვის მსაჯები და ოფიციალური პირები დანიშნა.

12 რეფერის შორისაა ქართველი ნიკა ამაშუკელი. მას მსოფლიო თასზე დებიუტი ექნება და გახდება პირველი მსაჯი ტიერ2 ქვეყნებიდან, რომელსაც წილად ასეთი პატივი ხვდა. მის გარდა კიდევ სამი დებიუტანტია – ენდრიუ ბრისი (ირლანდია), მეთ კარლი (ინგლისი) და კარლ დიქსონი (ინგლისი).

დიქსონი ბორჯღალოსნების მატჩსაც მსაჯობს. მის გარდა საქართველოს შეხვედრებს ლუკ პირსი, პოლ უილიამსი და მეთიუ რეინალი განსჯიან. ბორჯღალოსნებისთვის ოთხივე მსაჯი კარგადაა ნაცნობი.

8 სექტემბერს, მსოფლიო თასის გახსნით მატჩს, რომელშიც მასპინძელი საფრანგეთი ახალ ზელანდიას ეთამაშება, რეფერი სამხრეთ აფრიკელი იაკო პეიპერი განსჯის, რომელმაც ახლახანს თბილისში, საქართველოსა და აშშ-ს შეხვედრა იმსაჯა. პეიპერს ერთხელ, 2015 წლის მსოფლიო თასზე უკვე აქვს ნამსაჯი გახსნითი შეხვედრა. მაშინ „თვიქენჰემზე“ ინგლისი ფიჯის შეერკინა.

მთლიანობაში, 12 რეფერის ჯამში 700-ზე მეტი ტესტ-მატჩი აქვს ნამსაჯი. მათ შორის ყველაზე გამოცდილი უეინ ბარნსია, რომელიც რეკორდულ, მეხუთე მსოფლიო თასზე იმსაჯებს. აქამდე მას მსოფლიო თასებზე 21 თამაში აქვს ნამსაჯი, ჯგუფური ეტაპის დასრულების შემდეგ კი 25 შეხვედრა მოუგროვდება. აღსანიშნავია, რომ დანარჩენ 11 რეფერის მსოფლიო თასებზე ჯამში 24 მატჩი აქვთ ნამსაჯი. ბარნსის გარდა ჯგუფური ეტაპის 4-4 თამაშზე მოედნის მსაჯები იქნებიან ლუკ პირსი, კარლ დიქსონი და მეთ რეინალი.

ვინ გვიმსაჯებს საფრანგეთში

ბორჯღალოსნები მსოფლიო თასზე პირველ თამაშს 9 სექტემბერს სენ’დენიში, „სტად დე ფრანსეზე“ ავსტრალიასთან გამართავენ და რეფერი ინგლისელი ლუკ პირსი იქნება. რომელიც თბილისში ორჯერაა ნამყოფი და ჯამში საქართველოს ხუთი თამაში აქვს ნამსაჯი.

ჩვენს ქვეყანას ის 2014 წელს ორჯერ ეწვია და ჯერ რაგბი ევროპის ჩემპიონატზე რუმინეთთან 22:9 მოგებული მატჩი განსაჯა, მერე კი „თბილისის თასზე“ არგენტინის „ა“ ნაკრებთან შეხვედრა (16:26). მან 2017 წელს ქართველებისა და არგენტინელების თამაში კიდევ ერთხელ იმსაჯა, ამჯერად ტესტ-მატჩი ხუხუიში (29:45); პირსი 2019 წლის მსოფლიო თასზე უელსთან გამართული შეხვედრის (14:43) მთავარი მსაჯი იყო, 2020 წელს კი იმავე უელსთან მთავარი მსაჯი „შემოდგომის ერთა თასზე“ იყო (0:18).

პირსს კიდეებიდან ახალ ზელანდიელი ჯეიმს დოლემანი და უელსელი კრეიგ ევანსი დაეხმარებიან.

23 სექტემბერს საქართველო პორტუგალიას ტულუზში ერკინება და მოედნის მსაჯი ახალ ზელანდიელი პოლ უილიამსია. 2019 წლის მსოფლიო თასზე მან საქართველოსა და ფიჯის შეხვედრა (10:45) განსაჯა, 2022 წელს კი საქართველოში ჩამოვიდა და „დინამო არენაზე“ საქართველოსა და ურუგვაის ტესტ-მატჩი იმსაჯა (34:18).

უილიამსს კიდეებიდან ინგლისელები – მეთიუ ქარლი და ქრის ბასბი დაეხმარებიან.

30 სექტემბერს ბორჯღალოსნები ბორდოში ფიჯის ერკინებიან. რეფერი ინგლისელი კარლ დიქსონია, რომელიც 2018 წელს „ავჭალაზე“ სამოასთან 27:19 მოგებული მატჩის მთავარი მსაჯი იყო. მას კიდეებიდან სამხრეთ აფრიკელი იაკო პეიპერი და ფრანგი პიერ ბრუსე დაეხმარებიან.

ჯგუფურ ეტაპს 7 ოქტომბერს ნანტში, უელსთან მატჩით ვასრულებთ, სადაც მოედნის მსაჯი ფრანგი მეთიუ რეინალი იქნება. მას ბორჯღალოსნების თამაში აქამდე 6-ჯერ უმსაჯია და ქართველი მორაგბეებისთვის ყველაზე კარგადაა ნაცნობი. მსოფლიო თასის დაწყებამდე რეინალი კიდევ ერთხელ იმსაჯებს ბორჯღალოსნების შეხვედრას – 26 აგვისტოს „მარიფილდზე“, ის საქართველოსა და შოტლანდიის მატჩის მოედნის მსაჯია.

2012 წელს ის რაგბი ევროპის ჩემპიონატზე „მიხეილ მესხზე“ რუსეთთან 46:0 მოგებული შეხვედრის მთავარი მსაჯი იყო, 2015 წელს კი „თბილისის თასზე“ ირლანდიის „ა“ ნაკრებთან მატჩი განსაჯა (12:45). 2017 წელს რეინალი იყო მთავარი მსაჯი „ფრინციფალითიზე“, როდესაც უელსმა 13:6 გაიმარჯვა. 2018 წელს მეთიუ მესამედ ჩამოვიდა თბილისში და „მიხეილ მესხზე“ ტონგასთან 20:9 მოგებული თამაში განსაჯა. 2020 წლის „შემოდგომის ერთა თასზე“ ფრანგი რეფერი ორჯერ იყო ბორჯღალოსნების შეხვედრის მოედნის მსაჯი – ინგლისთან (0:40) და ირლანდიასთან (10:23).

რეინალს კიდეებიდან ახალ ზელანდიელი ბენ ო’კეფე და ფრანგი პიერ ბრუსე დაეხმარებიან.

ნიკა ამაშუკელი – 7 თამაში ჯგუფურ ეტაპზე

მსოფლიო თასზე ნიკა ამაშუკელის დებიუტი 9 სექტემბერს ბორდოში, ირლანდიისა და რუმინეთის მატჩში შედგება. მას ასისტენტობას უეინ ბარნსი და იტალიელი ანდრე პიარდი გაუწევენ.

მთლიანობაში, მსოფლიო თასის ჯგუფურ ეტაპზე ამაშუკელი 7 მატჩში მიიღებს მონაწილეობას და აქედან სამში მოედნის მსაჯი იქნება იქნება, 4-ში კი პირველი ასისტენტი.

9 სექტემბრის შემდეგ ის მოედნის მსაჯი 17 სექტემბერს იქნება, როდესაც ნიცაში ინგლისი იაპონიას ეთამაშება. მას კიდეებიდან ავსტრალიელი ნიკ ბერი და ანდრე პიარდი დაეხმარებიან.

მესამე შეხვედრა, რომელშიც ამაშუკელი რეფერადაა დანიშნული 1 ოქტომბერს სენტ-ეტიენში, ავსტრალიასა და პორტუგალიას შორის გაიმართება. ნიკას ასისტენტები მეთიუ რეინალი და ანდრე პიარდი იქნებიან.

ოთხ თამაშში ამაშუკელი რეფერის პირველი ასისტენტია. 10 სექტემბერს ის მარსელში, სამხრეთ აფრიკისა და შოტლანდიის შეხვედრაში ავსტრალიელ ენგუს გარდნერს დაეხმარება; 22 სექტემბერს სენტ-ეტიენში არგენტინა – სამოას შეხვედრაში მთავარი მსაჯი ნიკ ბერია; 24 სექტემბერს ნიცაში შოტლანდია ტონგას ეთამაშება და ამაშუკელი კარლ დიქსონის ასისტენტია; 7 ოქტომბერს ლილში ინგლისი სამოას ერკინება და ქართველი რეფერი ენდრიუ ბრაისს დაეხმარება.