ტურნირის საუკეთესო მოთამაშე - 18 წლის ქართველის აღიარება იტალიაში

„კრემონეზეს“ 19-წლამდე გუნდმა ანჯელო კუარენგის სახელობის ოთხთა ტურნირი მოიგო. ტურნირის საუკეთესო ფეხბურთელად კრემონული გუნდის საყრდენი ნახევარმცველი დაჩი ლორთქიფანიძე დასახელდა.

ოთხთა ტურნირში „კრემონეზეს“, „ატალანტას“, „ალბინოლეფესა“ და ჰელას „ვერონას“ 19-წლამდე გუნდები მონაწილეობდნენ. ნახევარფინალში „კრემონეზეს“ 19-წლამდე გუნდმა „ალბინოლეფეს“ 4:2 მოუგო. ფინალში კრემონულმა გუნდმა „ატალანტა“ პენალტების სერიაში დაამარცხა, ერთი პენალტი დაჩიმ შეაგდო.

დაჩი ლორთქიფანიძე „კრემონეზეს“ ასაკობრივ გუნდებში ხუთი წელია ასპარეზობს, ''კრემონეზეს'' 16-წლამდე გუნდის კაპიტანი იყო, შემდეგ 17-წლამდე გუნდს კაპიტნობდა, ახლა კი 19-წლამდე გუნდის კაპიტანია. დაჩი ლორთქიფანიძის მთავარი პოზიციაა საყრდენი ნახევარმცველია, თუმცა საჭიროების შემთხვევაში ცენტრალური მცველის პოზიციაზეც შეუძლია თამაში. 18 წლის ფეხბურთელს საქართველოს 16, 17 და 18 წლამდე ნაკრებებში უთამაშია.