მბაპე წინასასეზონო ტურნეს მიღმა | პარი სენ-ჟერმენში ვითარება იძაბება
„პარი სენ-ჟერმენის“ სუპერვარსკვლავი, კილიან მბაპე კლუბის წინასასეზონო ტურნეს განაცხადში არაა. ამ ინფორმაციას გავლენიანი ფრანგული გამოცემა, L’Equipe-ი ავრცელებს და პარიზული გრანდის ხელმძღვანელთა დამოკიდებულებაზე ცნობებს გვაწვდის.
„პარკ დე პრენსის“ ბინადრები დარწმუნებული არიან, რომ მბაპეს „რეალთან“ შეთანხმება აქვს დადებული, რომლის მიხედვითაც, 2024 წელს, „სამეფო კლუბის“ მოთამაშე გახდება. კილიანი პსჟ-სთან კონტრაქტს სწორედ ამიტომ არ ახანგრძლივებს და მის წინააღმდეგ ზომების გატარება დაიწყეს.
Kylian Mbappé ne fera pas la tournée du #PSG. Décision du club qui est persuadé que le joueur a un accord avec le Real Madrid pour 2024. « Personne n’est plus grand que le club, la porte est ouvert pour tous ceux qui ne sont pas heureux » nous a-t-on dit.
— Loïc Tanzi (@Tanziloic) July 21, 2023
„არავინაა კლუბზე დიდი და კარი ღიაა მათთვის, ვინც ბედნიერი არ გახლავთ“, - განუცხადეს L’Equipe-ს „პარი სენ-ჟერმენში“ და როგორც ჩანს, პარიზელები დათმობებზე წასვლას არ აპირებენ. მათი მიზანია, მბაპე ზაფხულის სატრანსფერო ფანჯრისას გაყიდონ ან იგი ხელშეკრულების გახანგრძლივებაზე დაიყოლიონ.
შეგახსენებთ, რომ მბაპეს დაყოლიებას, რომ ხელშეკრულება გაახანგრძლივოს, საფრანგეთის პრეზიდენტი, ემანუელ მაკრონიც ცდილობს. ფრანგული პრესის ცნობით, თუ კილიანმა გადაწყვეტილება არ შეცვალა, „პარი სენ-ჟერმენი“ მზადაა, მას სათამაშო დრო არ მისცეს და მთელი სეზონის განმავლობაში სათადარიგოთა სკამზე დატოვოს.
