მეორე ოქრო! - ზურაბ კინწურაშვილი ევროპული თამაშების ჩემპიონია

პოლონეთში მიმდინარე მესამე ევროპულ თამაშებზე საქართველოს დელეგაციამ მეორე ოქროს მედალი მოიპოვა.

ტაეკვონდოში, -74 კგ. წონითი კატეგორიის ფინალში ზურაბ კინწურაშვილი ბოსნია & ჰერცეგოვინელ ჰეჯად ჰუსიჩს შეხვდა და ორივე რაუნდში დამაჯერებლად დაამარცხა.

პირველმა რაუნდმა ქართველი სპორტსმენის უპირატესობით ჩაიარა და კინწურაშვილმა 10:7 მოიგო.

რაც შეეხება მეორე რაუნდს, პერიოდის ბოლომდე ბოსნიელი 4:2 ლიდერობდა, თუმცა დასკვნით წამებში ზურაბ კინწურაშვილი გააქტიურდა და საბოლოოდ, მეტოქეს გამარჯვების ქულები აუღო.

შეგახსენებთ, რომ დღეს, ევროპული თამაშების გამარჯვებული მოფარიკავე სანდრო ბაზაძე გახდა, რომელმაც ფინალში მასპინძელი ქვეყნის წარმომადგენელი დაამარცხა.