ვალენსიამ სელტა დაამარცხა - მამარდას მორიგი კარგი მატჩი

ლა ლიგის 34-ე ტურში „ვალენსიამ“ „მესტალიაზე“ ვიგოს „სელტას“ უმასპინძლა და 2:1 დაამარცხა. 

ამ გამარჯვების შემდეგ „ვალენსია“ 37 ქულით მე-14 ადგილზეა და გასავარდნ ზონას 3 ქულით უსწრებს. 35-ე ტურში „ვალენსია“ მადრიდის „რეალს“ უმასპინძლებს, შეხვედრა 21 მაისს გაიმართება.

ანგარიში მე-8 წუთზე ჯასტინ კლუივერტმა გახსნა. შეტევა გიორგი მამარდაშვილის გადაცემით დაიწყო, საგოლე პასი დიეგო ლოპესის ანგარიშზეა. 51-ე წუთზე მამარდაშვილმა სეფეროვიჩის დარტყმა მოიგერია, თუმცა მე-60 წუთზე შვეიცარიელმა ანგარიში გაათანაბრა. „ღამურების“ მცველები შეცდნენ, სეფეროვიჩმა თავით შეაგდო. 88-ე წუთზე ფულკიეს პასით 21 წლის ალბერტო მარიმ გამარჯვების გოლი გაიტანა, „ვალენსიამ“ უმნიშვნელოვანესი სამი ქულა მოიპოვა - 2:1.

გიორგი მამარდაშვილი „სელტასთან“ მატჩში დამაჯერებელი იყო, შეცდომა არ დაუშვია. Sofascore-მა 7,5 დაუწერა, რაც „ღამურებში“ ერთ-ერთი საუკეთესო შეფასება იყო.

გიორგი მამარდაშვილმა მიმდინარე სეზონის ლა ლიგაში 34 მატჩი ჩაატარა, ექვს შეხვედრაში კარი მშრალად შეინახა. გარდა ამისა, ესპანეთის თასზე ორ შეხვედრაში გოლი არ გაუშვა.