ანჩელოტი: „მიზანი თავდამსხმელის შეძენაა, ბენზემა პატარა აღარაა“

მადრიდის „რეალის“ მთავარმა მწვრთნელმა, კარლო ანჩელოტიმ კლუბის პრესსამსახურთან ინტერვიუს დროს ზაფხულში სატრანსფერო გეგმებზე ისაუბრა და განაცხადა, რომ გუნდისთვის პრიორიტეტული თავდამსხმელის შეძენა იქნება.

რა თქვა ანჩელოტიმ:

კლუბისთვის მთავარი მიზანი მომავალ სატრანსფერო ფანჯარაზე თავდამსხმელის შეძენა იქნება, რადგან კარიმი ახალგაზრდა აღარ არის. თუმცა, სანამ ის კარგად იქნება, შემადგენლობის უცვლელი წევრი იქნება და მის შეცვლაზე არ ვიფიქრებთ.

გასულ სეზონში შეტევითი ხაზი ძალიან კარგად მუშაობდა, რაც ამ სეზონშიც გრძელდება. წელს ბენზემას როგორც აღმავლობა, ისე ვარდნაც ჰქონდა, თუმცა ვინისიუსი და როდრიგო პროგრესირებენ. ბოლო ორი წლის განმავლობაში მათ საოცარი სამუშაო გასწიეს. ვფიქრობ, „რეალისთვის“ შეტევითი ხაზის პრობლემა არასდროს ყოფილა.

მიმდინარე სეზონში „სამეფო კლუბმა“ კოპა დელ რეის ფინალში მოახერხა გასვლა, ჩემპიონთა ლიგის ნახევარფინალში კი „მანჩესტერ სიტის“ შეხვდება. რაც შეეხება ლა ლიგას, ესპანეთის ჩემპიონატში „რეალი“ მეორე პოზიციაზე იმყოფება და ლიდერ „ბარსელონას“ 11 ქულით ჩამორჩება. ტურნირის დასრულებამდე 6 ტური არის დარჩენილი და რთული წარმოსადგენია, კატალონიურმა კლუბმა ეს უპირატესობა გაანიავოს.