„ინსინიეს, კულიბალისა და მერტენსის ჩანაცვლება შეუძლებელია“ - ნაპოლის ექს-მოთამაშე

„ნაპოლის“ ექს-ფეხბურთელმა, ფაუზი გულამიმ Canale 8-ს ვრცელი ინტერვიუ მისცა და ყოფილ კლუბზე ისაუბრა. გულამიმ დაასახელა ფეხბურთელი, რომელმაც მასზე დიდი შთაბეჭდილება მოახდინა და ქართველი შემტევი, ხვიჩა კვარაცხელია გამოარჩია.

„ლორენცო ინსინიე, კალიდუ კულიბალი და დრის მერტენსი შესანიშნავი ადამიანები და ფეხბურთელები არიან და მათი ჩანაცვლება შეუძლებელია, თუმცა ახალგაზრდა მოთამაშეებს, რომლებიც გუნდში მათ ნაცვლად მივიდნენ, სათანადო რეაქცია ჰქონდათ. ერთ-ერთი, ვინც ჩემზე შთაბეჭდილება მოახდინა, ხვიჩა კვარაცხელიაა, რომელსაც იდეალური სეზონი აქვს.

სკუდეტოს რაც შეეხება, ის მთელ ქალაქს ეკუთვნის და ნეაპოლი ტიტულს აქამდეც იმსახურებდა. ნაპოლიში რომ ვთამაშობდე, წარმატება ჩემ გამო კი არა, ქალაქის გამო გამიხარდებოდა. სხვა ქალაქებში პირად მიღწევებსა და ტიტულებს დიდ მნიშვნელობას ანიჭებენ, ნეაპოლში ყველაფერი სხვანაირადაა“.

შეგახსენებთ, რომ „ნაპოლის“ 78 ქულა აქვს და დიდი ალბათობით, სერია A-ს მომდევნო ტურში „სკუდეტოს“ ოფიციალურად გაიფორმებს. „პარტენოპეი“ უშუალო მდევარს, „ლაციოს“ 17 ქულით უსწრებს და თუ „არწივებმა“ „ინტერთან“ ვერ მოიგეს და „ნაპოლიმ“ „სალერნიტანა“ დაამარცხა, ნეაპოლელები ნანატრ ტიტულს იზეიმებენ.