კასტელანოსის პოკერი - ჟირონამ რეალს შანსი არ დაუტოვა

ლა ლიგის მორიგ ტურში მადრიდის „რეალმა“ სტუმრად „ჟირონასთან“ მოულოდნელი მარცხი განიცადა. დღევანდელ საღამოს, მასპინძელთა ფეხბურთელს კასტელანოსს ისტორიული მატჩი ჰქონდა.

არგენტინელმა ფეხბურთელმა „სამეფო კლუბს“ 4 გოლი გაუტანა და სწორედ მისი ბრწყინვალე თამაშის შედეგად მოიგო „ჟირონამ“.

კასტელანოსმა ანგარიში მე-12 წუთზე გახსნა. 24 წლის ფეხბურთელმა დუბლი 24-ე წუთზე შეასრულა. ზუსტად 10 წუთში ვინისიუს ჯუნიორმა ერთი ბურთი გაქვითა და პირველი ტაიმი 2:1 დასრულდა.

მეორე ნახევარში კასტელანოსმა ისევ გაიბრწყინა 46-ე და 62-ე წუთებზე ლუნინს შანსი არ დაუტოვა და სხვაობა გამანადგურებელი გახადა. მატჩის მიწურულს, ლუკას ვასკესმა სხვაობა ორამდე შეამცირა და საბოლოო შედეგი 4:2 დააფიქსირა.

შეგახსენებთ, რომ „ბლანკოსს“ ლა ლიგის მოგებაზე დიდი ხანია ხელი აქვს ჩაქნეული. ესპანეთის ჩემპიონატს 76 ქულით კატალონიის „ბარსელონა“ ლიდერობს, ხოლო „რეალი“ 65 ქულით მეორე ადგილზე რჩება. ცნობისთვის, ჩავის გუნდს 1 მატჩით ნაკლები აქვს ჩატარებული.

აღსანიშნავია, რომ კასტელანოსი 1947 წლის შემდეგ, პირველი ფეხბურთელია, რომელმაც "რეალს" ლა ლიგაში პოკერი შეუსრულა. 76 წლის წინ, ამის გაკეთება ესტევან ეჩევერიამ შეძლო.