მოკრივეთა მსოფლიო ჩემპიონატს ოლიმპიური თამაშებისთვის საკვალიფიკაციო დატვირთვა არ ექნება

საერთაშორისო ოლიმპიური კომიტეტის (IOC) განცხადებით, კრივის საერთაშორისო ასოციაციის (IBA) მიერ ჩასატარებელ მსოფლიო ჩემპიონატს პარიზის 2024 წლის ოლიმპიური თამაშების სალიცენზიო ტურნირის დატვირთვა არ ექნება. IOC-ის განმარტებით, საერთაშორისო ოლიმპიურ კომიტეტში IBA-ს წევრობა კვლავინდებურად შეჩერებულია.

IOC-მა პირველად 2022 წლის ივნისში განაცხადა, რომ 2024 წლის პარიზის თამაშებზე მოკრივეთა ტურნირი არ ჩატარდებოდა IBA-ს ეგიდით. ამას წინ უძღოდა IBA-ს განცხადება, რომლის მიხედვითაც, მოკრივეთა მსოფლიო ჩემპიონატი პარიზი-2024-ის საკვალიფიკაციო შეჯიბრება იქნებოდა.

"კრივში პარიზი-2024-ის ერთადერთი მოქმედი საკვალიფიკაციო სისტემა ეს არის IOC-ის აღმასრულებელი საბჭოს მიერ 2022 წლის სექტემბერში მიღებული სისტემა, რომელიც 2022 წლის 6 დეკემბერს გამოქვეყნდა და გავრცელდა ეროვნულ ოლიმპიურ კომიტეტებს და კრივის ეროვნულ ფედერაციებს შორის. IOC-მა 2019 წელს IBA-ს აღიარება შეაჩერა და ის დღესაც ძალაშია," - ნათქვამია IOC-ის ბოლო განცხადებაში.

მას შემდეგ, რაც IOC-მა IBA-ს წევრობა (მაშინ - AIBA) შეაჩერა, ტოკიოს ოლიმპიურ თამაშებზე მოკრივეთა ტურნირი სწორედ IOC-ის მიერ საგანგებოდ შექმნილი კომისიის პატრონაჟით ჩატარდა (საგულისხმოა, რომ კრივი 2028 წლის ოლიმპიური თამაშების წინასწარ პროგრამაში არ შედის).

2022 წლის 5 ოქტომბერს IBA-მ შეჯიბრებებზე დაუშვა მოკრივეები რუსეთიდან და ბელარუსიდან. ისიც გასათვალისწინებელია, რომ კრივის საერთაშორისო ასოციაციამ ორივე ქვეყნის წარმომადგენლებს საერთაშორისო ტურნირებზე სახელმწიფო დროშით და ჰიმნით გამოსვლის უფლებაც მისცა. რიგი ქვეყნების ასოციაციებმა, მათ შორის აშშ-მ, კანადამ, დიდმა ბრიტანეთმა და შვეიცარიამ ეროვნული ატრიბუტით რუსეთის და ბელარუსის ნაკრებების დაშვების გამო, 2023 წლის მსოფლიო ჩემპიონატს ბოიკოტი გამოუცხადა.