ჰიოვედესი: „კვარა ერთი-ერთზე ძალიან მაგარია“

გერმანიის ნაკრების ყოფილმა ფეხბურთელმა, ბენედიქტ ჰიოვედესმა ჩემპიონთა ლიგის მერვედფინალურ დაპირისპირებებზე ისაუბრა. ჰიოვედესი „ნაპოლისა“ და „აინტრახტის“ ჯახსაც შეეხო, ხვიჩა კვარაცხელიაზე გაამახვილა ყურადღება და ქართველი შემტევი დაახასიათა.

„ნაპოლის შესანიშნავი სეზონი აქვს და სერია A-ში დიდი უპირატესობა მოიპოვა. ხვიჩა კვარაცხელიასთან ერთად, მოსკოვის ლოკომოტივში ვთამაშობდი. მაშინ ის ძალიან ახალგაზრდა იყო, თუმცა გვაჩვენა, რომ დიდი პოტენციალი აქვს. ხვიჩა ერთი-ერთზე შესანიშნავია და მისგან სერიოზული საფრთხე მოდის. ჩემი აზრით, აინტრახტი აუტსაიდერია“.

შეგახსენებთ, რომ ქართველი ფეხბურთელის გუნდის მომდევნო გაჩერება „სასუოლოა“, რომელსაც პარასკევს, თბილისის დროით, 23:45-ზე გაეჯიბრება. ჩემპიონთა ლიგას რაც შეეხება, „პარტენოპეი“ თავის შეხვედრას 22 თებერვალს გამართავს. ნეაპოლური გრანდი სტუმრის სტატუსით იასპარეზებს.

ცნობისთვის, სერია A-ს მიმდინარე სეზონში, „კვარას“ ანგარიშზე 9 გოლი და ამდენივე საგოლე გადაცემაა. იგი ევროპის ტოპ 5 ჩემპიონატის ერთადერთი დებიუტანტია, რომელსაც ეს სტატისტიკა აქვს გაფორმებული. ყველა ტურნირის ეგიდით, მან 23 მატჩში ითამაშა და 11 გოლი და 12 საგოლე გადაცემა მიითვალა.