ლოჩოშვილი მოედანს უბრუნდება - ნაპოლისთან თამაში საეჭვოა
CrystalSport-ის ცნობით, „კრემონეზეს“ ქართველი მცველი ლუკა ლოჩოშვილი ინდივიდუალურად ვარჯიშობს. სავარაუდოდ, გუნდთან ერთად ვარჯიშს მიმდინარე კვირაში, უახლოეს დღეებში განაახლებს.
დავიდე ბალარდინის მთავარ მწვრთნელად დანიშვნის შემდეგ ლოჩოშვილმა სერია ა-ს სამი და იტალიის თასის ორი შეხვედრა გამოტოვა. „კრემონეზემ“ იტალიის თასიდან „ნაპოლი“ და „რომა“ გამოთიშა, თუმცა კუნთის ტრავმის გამო ქართველი მცველი გუნდს ვერ დაეხმარა.
12 თებერვალს, სერია ა-ს 22-ე ტურში „ნაპოლი“ „კრემონეზეს“ უმასპინძლებს. სავარაუდოდ, ლუკა ამ შეხვედრას გამოტოვებს, თუმცა შესაძლოა სამატჩო განაცხადში ვიხილოთ.
21 ტურის შემდეგ სერია ა-ში „კრემონეზე“ 8 ქულით მე-20 ადგილზეა, „სამპდორიას“ 2 ქულით ჩამორჩება, „ვერონას“ - 6 ქულით, „სპეციას“ კი - 10 ქულით.
შეგახსენებთ, გასულ ზაფხულში ლუკა „ვოლფსბერგერიდან“ 1,6 მილიონი ევროს სანაცვლოდ „კრემონეზეში“ გადავიდა. საქართველოს ეროვნული ნაკრების ცენტრალური მცველი სერია ა-ში სადებიუტო სეზონს ატარებს, მის აქტივში 14 მატჩში 1 საგოლე პასია. ლუკა მაღალ დონეზე თამაშობს, დამაჯერებლობითა და საიმედოობით გამოირჩევა.
