„ყველაზე სასტიკი რამ არის“ - ნოიერის სკანდალური ინტერვიუ და კანის პასუხი
მიუნხენის „ბაიერნმა“ ცოტა ხნის წინ, მეკარეების მწვრთნელი ტონი ტაპალოვიჩი დაითხოვა, ამის მიზეზად იულიან ნაგელსმანთან კონფლიქტი სახელდება.
„რეკორდმაისტერის“ მეკარემ და კაპიტანმა მანუელ ნოიერმა, ტაპალოვიჩის დათხოვნის შესახებ ინტერვიუ ჩაწერა, რომელიც სკანდალური გამოდგა და ამ ყველაფერმა „ბაიერნის“ ბოსების განაწყენება გამოიწვია.
„ჩემთვის ეს დიდი დარტყმა იყო - როცა უკვე მიწაზე ვიწექი. ისეთი შეგრძნება მქონდა, თითქოს გული ამომივარდა. ეს იყო ყველაზე სასტიკი რამ, რაც ჩემს კარიერაში განმიცდია. და მე ბევრი გადავიტანე. ჩვენი მეკარეების ჯგუფში ყველა ნაწილებად დაიშალა. ხალხი ტიროდა“.
- როგორც გითხრეს, რა იყო ტაპალოვიჩის გათავისუფლების მიზეზი?
„არ იყო არანაირი მიზეზი, რომლის გაგებასაც შევძლებდი. ითქვა ისეთი რამ, რასაც არ ვეთანხმები. არაფერი გამიგია, რომ გამორიცხული იყო ერთმანეთთან საუბარი და რაღაცების დალაგება“.
- ახალ ამბებში ასევე ვარაუდობდნენ, რომ ტაპალოვიჩი გაათავისუფლეს იმის გამო, რომ მან, სავარაუდოდ, ინფორმაცია მოგაწოდა სამწვრთნელო შტაბიდან და ამის გამო იგი გასახდელში შევიდა.
„არა. ასი პროცენტით არა. ტონი ამას არასდროს აკეთებდა არცერთი მწვრთნელის დროს“.
- როგორ გრძნობთ თავს ამ ამბის გაგების შემდეგ?
„დიდი იმედგაცრუებაა. ჩვენ ვსაუბრობთ ადამიანურ მხარეზე, იმაზე, თუ როგორ ექცეოდნენ ისინი ღირებულ თანამშრომელს. ჩვენ გვინდა ბაიერნში ვიყოთ ოჯახი. და შემდეგ ხდება ისეთი რამ, რაც აქამდე არასდროს განმიცდია.
ეს ყველასთვის სამწუხაროა: კლუბისთვის, ტაპასთვის, პერსონალისთვის და ყველა მეკარისთვის, მათ შორის ჩემთვისაც. თუმცა მინდა ვთქვა: ერთი მხრივ კაცი ვარ, მეორე მხრივ კი პროფესიონალი“,
- განაცხადა ნოიერმა.
კანი ინტერვიუს გამო ნოიერს აკრიტიკებს - მანუს დასჯა ელის
Bild-ის ცნობით, „ბაიერნის“ ხელმძღვანელობა ნოიერის ამ სიტყვებით უკმაყოფილო დარჩა. კლუბთან ინტერვიუ არ შეთანხმებულა და ახლა მას სანქციები ემუქრება - როგორც მინიმუმ ჯარიმა.
კლუბის გენერალურმა დირექტორმა ოლივერ კანმა, ამ ინტერვიუს გამო ნოიერი გააკრიტიკა:
„ის, რაც მანუელმა თქვა ტონი ტაპალოვიჩის გათავისუფლებასთან დაკავშირებით, არ შეესაბამება მისი როგორც კაპიტნის სტატუსს ან ბაიერნის ღირებულებებს. გარდა ამისა, მისი განცხადებები არასწორ დროს გაკეთდა, რადგან წინ ძალიან მნიშვნელოვანი თამაშები გველის“,
- ციტირებს კანის სიტყვებს Bild-ი.
