ვალენსიას პრეზიდენტი: „მამარდასთან კონტრაქტის გახანგრძლივება სტრატეგიული ნაბიჯი იყო“

გიორგი მამარდაშვილის „ვალენსიას“ პრეზიდენტმა, ლაიჰუნ ჩანმა პრესკონფერენცია გამართა და ჟურნალისტების შეკითხვებს უპასუხა. ჩანმა „ღამურების“ სამომავლო გეგმებზე, ჯენარო გატუზოზე, ფინანსურ მდგომარეობაზე და ბევრ საინტერესო თემაზე ისაუბრა.

კლუბის მფლობელების გეგმები

„ვალენსიას განვითარებაში ბოლომდე ვართ ჩართული და მუშაობას ვერ შევწყვეტთ. ჩვენი მიზანი იგივეა და კლუბისთვის საუკეთესო გვინდა. სეზონი კარგად დავიწყეთ, მაგრამ შემდეგ ვითარება შეიცვალა, რაც არავის მოეწონა და გვსურს, წარმატებულ გზას დავუბრუნდეთ“.

ჯენარო გატუზოზე

„გატუზოსთან კონტრაქტი ურთიერთშეთანხმების საფუძველზე გაწყდა და ტრანსფერები არაფერ შუაშია. ვალიადოლიდთან მატჩის შემდეგ, ჩვენ ჯენაროს ნდობა გამოვუცხადეთ, თუმცა მან შეხვედრა მოითხოვა და მივხვდით, რომ კარგი სიახლე არ გველოდა. გატუზომ განგვიცხადა, რომ ვერ ხედავდა გზას, რომლის დახმარებითაც, სიტუაციას გამოასწორებდა და მის სურვილს პატივი ვეცით“.

კლუბის ფინანსურ მდგომარეობაზე

„ყველამ იცის, პანდემიის შემდეგ და ჩემპიონთა ლიგის მიღმა დარჩენის გამო, კლუბი რა მდგომარეობაში იმყოფება, თუმცა ისიც იცით, რომ გაიასთან, მამარდაშვილთან, დიახაბისთან და გილამონთან კონტრაქტები გავახანგრძლივეთ, რაც მნიშვნელოვანი და სტრატეგიული ნაბიჯი იყო და ჩვენს ინვესტიციას წარმოადგენს“.

შეგახსენებთ, რომ „ვალენსიას“ 20 ქულა აქვს და სატურნირო ცხრილის მე-14 ადგილს იკავებს. „ღამურები“ მომდევნო შეხვედრას „რეალის“ წინააღმდეგ გამართავენ.