ევერტონის კოშმარი - დანჯუმა ცხვირწინ ააცალეს, გორდონს ნიუკასლი ყიდულობს

„ევერტონის“ პრობლემებს დასასრული არ უჩანს. „კანფეტებს“ სატრანსფერო ბაზარზეც არ უმართლებთ და „ვილიარეალის“ ფეხბურთელი, არნო დანჯუმა, რომლის გაფორმებასთანაც ერთ ნაბიჯში იყვნენ, „ტოტენჰემმა“ ცხვირწინ ააცალა.

ფაბრიციო რომანოს ინფორმაციით, „დეზებს“ ყველა დოკუმენტი მზად აქვთ და ტრანსფერს მალე დახურავენ. უახლოეს საათებში, დანჯუმა ლონდონში ჩაფრინდება, სამედიცინო შემოწმებას გაივლის და თუ ყველაფერმა კარგად ჩაიარა, კლუბთან ხელშეკრულებას გააფორმებს. „დეზები“ მას იჯარის წესით გაიფორმებენ და მისი გამოსყიდვის ვალდებულება არ ექნებათ.

რომანოს მიხედვით, „ევერტონი“ განრისხებული და გაოგნებულია, „ტოტენჰემმა“ დანჯუმა რომ ააცალა, თუმცა ეს ყველაფერი არაა. Daily Mail-ის ინფორმაციით, არის შანსი, „გუდისონ პარკი“ ენტონი გორდონმა დატოვოს. ეს უკანასკნელი „ჩელსის“ ყურადღების ცენტრში იყო, მაგრამ ახალი მსურველი გამოუჩნდა და მისით „ნიუკასლი“ ინტერესდება. „კაჭკაჭები“ დარწმუნებული არიან, რომ საქმეს ბოლომდე მიიყვანენ და შეტევის ხაზს გააძლიერებენ.

შეგახსენებთ, რომ მერსისაიდელები ახალ მთავარ მწვრთნელს ეძებენ და საქმე კარგად ამ მხრივაც არ აქვთ. „კანფეტებს“ მარსელო ბიელსას გადაბირება უნდოდათ, მაგრამ არგენტინელმა სპეციალისტმა განუცხადა, რომ „ევერტონს“ ძალიან ნელი გუნდი ჰყავს და თანამშრომლობაზე თანახმა მხოლოდ იმ შემთხვევაში იქნება, თუ ზამთარში სწრაფ ფეხბურთელებს მოუყვანენ.