ნაპოლი - კრემონეზე | სავარაუდო შემადგენლობები
დღეს, საქართველოს დროით 23:55 საათზე „კოპა იტალიას“ 1/8 ფინალში ხვიჩა კვარაცხელიას „ნაპოლი“ საკუთარ მოედანზე ლუკა ლოჩოშვილის „კრემონეზეს“ უმასპინძლებს.
ცნობილი იტალიური გამოცემა, TuttoMercatoweb-ი დღევანდელი მატჩის სავარაუდო შემადგენლობებს განიხილავს და წერს, რომ ლუჩანო სპალეტი ხვიჩას დასვენების შესაძლებლობას მისცემს. სავარაუდოდ, ქართველი ფეხბურთელი განაცხადში იქნება, თუმცა სათადარიგოთა სკამზე დარჩება და შეხვედრაში აუცილებლობის შემთხვევაში ჩაერთვება.
რას წერს TuttoMercatoweb-ი:
ჩემპიონატის ლიდერები ბრწყინვალე კონდიციებში არიან და მეორეადგილოსანს უკვე 9 ქულით უსწრებენ. „ნაპოლი“ კარგად გამოეხმაურა „ინტერისგან“ მიღებულ ნოკაუტს, დაამარცხა „სამპდორია“ და შემდეგ ყველა დროის ყველაზე პრინციპული მეტოზე, „იუვენტუსი“. „კრემონეზეს“ წინააღმდეგ ეს დაპირისპირება სპალეტისთვის კარგი შანსია, რომ როტაცია მოახდინოს და თამაშის შესაძლებლობა იმ ფეხბურთელებს მისცეს, რომლებსაც თავის გამოჩენის შანსი ხშირად არ ეძლევათ და ასევე მათ, რომლებსაც საერთოდ არ უთამაშიათ. დიდი ალბათობით, დღეს სალვატორე სირიგუს დებიუტი შედგება. ასევე, ითამაშებს ახლადჩამოსული ბერეჟინსკი და დი ლორენცოს ამოსუნთქვის საშუალება მიეცემა. ბევრს სურს რაჰმანის ნაცვლად ოსტიგარდის თამაში, ასევე დემე ლობოტკას დასვენების შესაძლებლობას მისცემს, იგივე იქნება სიმეონესა და ოსიმენის შემთხვევაშიც. მარცხენა ფლანგზე კვარაცხელიას ნაცვლად რასპადორი ითამაშებს, მარჯვენა ფლანგს კი ლოსანო დაიკავებს.
„ნაპოლის“ სავარაუდო შემადგენლობა „კრემონეზეს“ წინააღმდეგ: სირიგუ, ბერეჟინსკი, ოსტიგარდი, ჟუან ჟეზუსი, ოლივეირა, ნდომბელე, დემე, ელმასი, ლოსანო, სიმეონე, რასპადორი.
უკვე 100%-ით გამოირიცხა, რომ „ნაპოლის“ წინააღმდეგ ვერ ითამაშებს კრემონელთა ქართველი მცველი, ლუკა ლოჩოშვილი, რომელიც სამატჩო განაცხადში არაა. გავრცელებული ინფორმაციით, ლუკას ტრავმა აწუხებს, თუმცა კონკრეტულად რა სიმძიმისაა ქართველი მცველის დაზიანება, ეს ჯერჯერობით უცნობია. აქვე უნდა ითქვას, რომ რამდენიმე დღის წინ „კრემონეზეს“ მთავარ მწვრთნელად დავიდე ბალარდინი დაინიშნა და 59 წლის სპეციალისტს სადებიუტო მატჩი სწორედ სერია A-ს ლიდერთან ექნება.
ცნობისთვის, აღნიშნულ წყვილში გამარჯვებული მომდევნო ეტაპზე „რომას“ შეხვდება.
