„გრენობლის წარმატებას ვუსურვებ“ - კოხრეიძე ფრანგულ კლუბს დაემშვიდობა

გიორგი კოხრეიძემ წარუმატებელი 1,5-წლიანი პერიოდის შემდეგ ფრანგული „გრენობლი“ დატოვა. მხარეებს შორის კონტრაქტი ორმხრივი შეთანხმების საფუძველზე გაწყდა. ინფორმაცია კლუბმა დაადასტურა, მოგვიანებით კი ფეხბურთელი კლუბს დაემშვიდობა. „საბურთალოს“ ყოფილმა შემტევმა დაწერა:

„მადლობა „გრენობლისა“ და ყველა იმ ადამიანს, ვინც ყოველთვის ჩვენს მხარეს იყო. მსურს, კლუბს წარმატება ვუსურვო. მადლობა“.

24 წლის ფეხბურთელი ლიგა 2-ის კლუბში 2021 წლის ზაფხულში გადავიდა. ლიგა 2-ის სამატჩო განაცხადში 10-ჯერ მოხვდა, მხოლოდ ექვს შეხვედრაში მიიღო მონაწილეობა. სასტარტოში ერთადერთი მატჩი, 2021 წლის 3 დეკემბერს „ლე ავრისთან“ ჩაატარა.

საერთო ჯამში ლიგა 2-სა და საფრანგეთის თასის ჩათვლით მხოლოდ 152 წუთი ითამაშა, რაც გარკვეულწილად ტრავმითაც აიხსნება, თუმცა ფაქტია, რომ შესაძლებლობები ვერ გამოავლინა.

„გრენობლიში“ კიდევ ერთ ქართველს, ჯაბა ჯიღაურს უთამაშია, რომელმაც 2018-19 წლების სეზონის პირველ ნახევარში ლიგა 2-ის კლუბში 13 მატჩი ჩაატარა (1 სასტარტოში), თასისა და ჩემპიონატის ჩათვლით საერთო ჯამში 452 წუთი ითამაშა. კოხრეიძის მსგავსად ჯიღაურის კარიერაც საკმაოდ უფერული და არაპროდუქტიული გამოვიდა, მათ „გრენობლიში“ ადგილი ვერ დაიმკვიდრეს.