ზურიკოს ბენეფისი და ბრწყინვალე გოლი - ბორდომ უშუალო კონკურენტს მოუგო

საფრანგეთის ლიგა 2-ის მე-17 ტურში, ზურიკო დავითაშვილის „ბორდო“ საკუთარ კედლებში „სოშოს“ დაუპირისპირდა. ქართველი ფეხბურთელის კლუბმა მნიშვნელოვანი გამარჯვება მოიპოვა და ერთ-ერთი კონკურენტი 2:1 დაამარცხა, რაშიც დიდი წვლილი დავითაშვილმა შეიტანა.

ზურიკომ მატჩი ძირითად შემადგენლობაში დაიწყო და მოედანზე 68 წუთი გაატარა. ქართველი შემტევი „ბორდოს“ რიგებში ერთ-ერთი საუკეთესო იყო და 32-ე წუთზე, მეტოქის კარიც აიღო. დავითაშვილმა ბაქვას გადაცემით ისარგებლა, მოწინააღმდეგე მცველი ბრწყინვალე ცრუმოძრაობით ჩამოიშორა, მეკარეს შანსი არ დაუტოვა და ანგარიში 2:0 გახადა.

გეტყვით იმასაც, რომ ახალგაზრდა შემტევი დელორიე-შობემ ჩაანაცვლა, რომელსაც მინდორზე დიდი დრო არ გაუტარებია. 74-ე წუთზე, მან წითელი ბარათი მიიღო და საკუთარი გუნდი რიცხობრივ უმცირესობაში დატოვა. 10-კაციანმა „ბორდომ“ უპირატესობა შეინარჩუნა და მნიშვნელოვანი 3 ქულა აიღო.

„ბორდომ“ 3-მატჩიანი მოუგებელი სერია შეწყვიტა და სატურნირო ცხრილის მე-2 ადგილზე გადაინაცვლა. ზურიკოს გუნდს 31 ქულა აქვს და სწორედ „სოშოს“ გადაასწრო, რომლის აქტივშიც 30 ქულა გახლავთ. „ბორდო“ მომდევნო შეხვედრას 10 იანვარს გამართავს და სტუმრად „კაენს“ დაუპირისპირდება.