„თუ ქუთაისმა შეგიყვარა, ეს სამუდამოა“ - ჩხეტიანის სამოტივაციო სიტყვები

2022 წლის საქართველოს თასის გათამაშება ქუთაისის „ტორპედოს“ გამარჯვებით დასრულდა. ფინალში კახა ჩხეტიანის გუნდმა თბილისის „ლოკომოტივი 2“ 2:0 დაამარცხა.

„ტორპედოს“ პრესსამსახურმა ფინალურ მატჩთან დაკავშირებით საინტერესო ვიდეო გამოაქვეყნა. ვიდეოდან აღსანიშნავია, მატჩისწინა მონაკვეთი, როცა კახა ჩხეტიანი ფეხბურთელებს ესაუბრება:

„მადლობა იმისთვის, რომ დღეს ჩვენ აქ ვართ და ეს ყველა თქვენგანის დამსახურებაა. თქვენ ამისთვის მაქსიმუმი გაიღეთ. ამიტომ, წარმატება ყოველთვის მაშინ მოდის, როდესაც შენი საქმე გიყვარს და ამ საქმისთვის ყველაფერს აკეთებ, შრომობ, რომ ეს გუნდი წარმატებული იყოს.

დღეს ის დღეა, რომელიც ქუთაისის „ტორპედოს“ ისტორიაში ჩაიწერება, აქ ჩაიწერება ყველა თქვენგანის გვარი გამარჯვების შემთხვევაში. თქვენს ზურგს უკან დიდი არმიაა, თქვენი ოჯახები, ჩვენი გულშემატკივრები და მთელი ქუთაისი. ქუთაისმა თუ შეგიყვარა, ეს სამუდამოა. 

ის ნიჭი, რომელიც თქვენ ღმერთმა მოგცათ, ძალიან ბევრ ადამიანს სიამოვნებას ანიჭებს. ამაზე დიდი ბედნირება არ არსებობს, ამაზე დიდი სიხარული არ არსებობს“.

შეგახსენებთ, საქართველოს თასის მფლობელი ქუთაისის „ტორპედო“ 2022-23 წლების სეზონის კონფერენს ლიგის საკვალიფიკაციო ეტაპზე ითამაშებს.