არგენტინის ნაკრებმა დრეიკის წყევლა გატეხა - რეპერმა მაინც ვერ მოიგო

არგენტინის ეროვნული ნაკრები მსოფლიო ჩემპიონი გახდა და ცნობილი რეპერის, დრეიკის წყევლა გატეხა. ამ უკანასკნელმა ივარაუდა, რომ სასურველ შედეგს „ალბისელესტე“ დააფიქსირებდა, თუმცა ლიონელ მესისა და კომპანიის ტრიუმფის მიუხედავად, დრეიკისთვის ყველაფერი კარგად მაინც არ დასრულებულა.

კანადელმა რეპერმა 1 000 000 დოლარის ოდენობის ფსონი არგენტინის ნაკრების ძირითად დროში გამარჯვებაზე გააკეთა. „ალბისელესტე“ 2:0-ს იგებდა და დრეიკი 2.75 მილიონთან ძალიან ახლოს იყო, თუმცა ბოლო წუთებზე საფრანგეთმა ორი ბურთი შეაგდო და ძირითადი დრო ფრედ დასრულდა.

სხვათა შორის, ამ ფაქტის გამო, სოციალური ქსელების რამდენიმე მომხმარებელმა დაწერა, რომ არგენტინის ნაკრებს დრეიკის წყევლა არ გაუტეხავს და სწორედ რეპერს „მიუძღვის“ წვლილი იმაში, რაც მატჩის ბოლოს მოხდა. ვნახოთ, მოვლენები როგორ განვითარდება და ვინ იქნება ის იშვიათი გამონაკლისი, რომელიც დრეიკის პროგნოზს გაამართლებს.

შეგახსენებთ, რომ სულ ცოტა ხნის წინ, კანადელმა რეპერმა 2 მილიონი დოლარი UFC-ის მებრძოლის, ისრაელ ადესანიას გამარჯვებაზე დადო, მაგრამ „უკანასკნელი სტაილბენდერი“ ალექს პერეირასთან დამარცხდა. დრეიკი 649 000 აშშ დოლარს „ბარსელონას“ გამარჯვებაზეც ჩამოვიდა, რომელსაც „რეალი“ უნდა დაემარცხებინა, მაგრამ არაფერი გამოუვიდა.