ჩელსიმ პოზიცია შეცვალა - რონალდუ შესაძლოა პრემიერ ლიგაში დარჩეს
კრიშტიანუ რონალდუ თავისუფალი აგენტია და კლუბებისგან შეთავაზებებს ელოდება. ბრიტანული პრესის ინფორმაციით, მისით ლონდონის „ჩელსია“ დაინტერესებული და შესაძლოა, „არისტოკრატებმა“ წინადადებით უახლოეს მომავალში მიმართონ.
Star-ისა და Sun-ის ინფორმაციით, „ლურჯებმა“ პოზიცია შეცვალეს და ამ მომენტისთვის, მზად არიან, რონალდუ გაიფორმონ. ეს არმანდო ბროიას ტრავმამ განაპირობა. ამ უკანასკნელმა სერიოზული დაზიანება მიიღო და დიდი ხნის გამოტოვება მოუწევს, რის გამოც, „ჩელსის“ ცენტრალური თავდამსხმელი დასჭირდა.
ცნობილმა სატრანსფერო ექსპერტმა, ფაბრიციო რომანომ აღნიშნა, რომ „არისტოკრატებისთვის“ კრიშტიანუ კარგი ვარიანტია, თუმცა დასძინა, რომ ლონდონელთა საფეხბურთო პროექტი ახალგაზრდა ფეხბურთელებზეა ორიენტირებული, რაც ტრანსფერის შანსებს ამცირებს. საინტერესოა, რომ ახლახან, რონალდუს საკითხზე „ჩელსის“ ექს-ფეხბურთელმა, უილიამ გალასმა ისაუბრა და კლუბს კრიშტიანუს გაფორმებისკენ მოუწოდა.
შეგახსენებთ, რომ ცნობილი ჟურნალისტის, პედრო სეპულვედას თქმით, რონალდუს მაღალი ხელფასი არ აინტერესებს. მას იდეალური პროექტი და უმაღლეს დონეზე თამაშის გაგრძელება სურს. მისი პრიორიტეტი ისეთი კლუბის პოვნაა, რომელიც ჩემპიონთა ლიგის მოსაგებად იბრძვის და აზიაში გადასვლას არც კი განიხილავს, თუმცა საუდის არაბეთის წარმომადგენლებისგან წინადადება ნამდვილად მიღებული აქვს.
