UFC-ის განახლებული რეიტინგი - ილია ტოპ 10 მებრძოლს შორისაა

UFC-იმ საკუთარი წონითი დივიზიონების რეიტინგი განაახლა და ქართველმა მებრძოლმა, ილია თოფურიამ წინ წაიწია. გასულ უქმეებზე, „ელ მატადორმა“ ბრაის მიტჩელის წინააღმდეგ იჩხუბა და ბრწყინვალე გამარჯვება მოიპოვა, რის წყალობითაც, მე-9 პოზიციაზე გადაინაცვლა.

ილია მე-14 იყო და 5 ადგილით დაწინაურდა, მისი ბოლო მეტოქე კი მე-11 გახლავთ. თოფურიას წარმატებული ასპარეზობის შემდეგ, UFC-ის ქვემსუბუქი წონითი დივიზიონის ტოპ 10-ში ორი ქართველი მებრძოლი გვყავს. „ელ მატადორზე“ ერთი საფეხურით მაღლა გიგა ჭიკაძე იმყოფება.

Ilia Topuria como era de esperar asciende al puesto #9 del ranking y le quita la posición a Bryce Mitchell #UFC pic.twitter.com/gLfA3LIZ16

— Pelunaton (@pelunaton) December 13, 2022

შეგახსენებთ, რომ ბრაის მიტჩელთან მოგებული ჩხუბის შემდეგ, ილიამ სასურველ მეტოქედ ბრაიან ორტეგა დაასახელა. ეს უკანასკნელი ქვემსუბუქი წონითი დივიზიონის ერთ-ერთი საუკეთესო მებრძოლია და რეიტინგის მე-3 პოზიციას იკავებს. როგორც მოგეხსენებათ, ჩემპიონი ალექსანდერ ვოლკანოვსკია, ხოლო ქამრის დასაკუთრების მთავარი პრეტენდენტი - მაქს ჰოლოუეი.

„ელ მატადორს“ კარიერაში 13 ბრძოლა აქვს გამართული და არც ერთხელ დამარცხებულა. ილიამ UFC-ში 5-ჯერ იჩხუბა და მსაჯების გადაწყვეტილებამდე საქმე მხოლოდ ერთხელ, სადებიუტო ჩხუბში, იუსეფ ზალალის წინააღმდეგ მიიყვანა, რომელიც მაშინ ერთ-ერთ ყველაზე პერსპექტიულ მებრძოლად ითვლებოდა.