მესი: „ასეთ მატჩებში ამ მსაჯის დანიშვნა არ შეიძლება, ხორვატია კარგი გუნდია“
არგენტინის ნაკრების სუპერვარსკვლავმა, ლიონელ მესიმ ნიდერლანდებთან გამართულ მატჩზე და მომდევნო მეტოქეზე ისაუბრა. „ლა პულგამ“ შეხვედრის მთავარი არბიტრი, მატეუ ლაოსი გააკრიტიკა და აღნიშნა, რომ მატჩი დამატებით დროში არ უნდა გადასულიყო.
„უდიდეს ბედნიერებასა და სიხარულს ვგრძნობ, მაგრამ შეხვედრა დამატებით დროში არ უნდა გადასულიყო და არც თერთმეტმეტრიანების სერია უნდა დანიშნულიყო. ტანჯვა მოგვიწია, მაგრამ წინსვლას ვაგრძელებთ და ეს ძალიან მაგარია! ვან გაალი ამბობს, რომ მისი გუნდი კარგ ფეხბურთს თამაშობს, მაგრამ ამ დროს, უბრალოდ მაღალი ფეხბურთელები შემოიყვანეს და გრძელი პასები გააკეთეს.
ხორვატიამ აჩვენა, რომ შესანიშნავი გუნდია და იყო მომენტები, როცა ბრაზილიას თანაბრად ეთამაშებოდნენ. ისინი დიდი ხანია ამ მწვრთნელთან ერთად მუშაობენ და ერთმანეთს კარგად იცნობენ. მთავარ არბიტრს რაც შეეხება, მსაჯზე საუბარი არ მინდა, რადგან დაგაჯარიმებენ და ვერ იტყვი იმას, რასაც ფიქრობ. ფიფამ სიტუაციას უნდა გადახედოს და ვფიქრობ, ასეთი ტიპის შეხვედრა ამ მსაჯს არ უნდა ანდონ, რადგან იგი ამ დონეს არ შეესაბამება. თამაშის დროს გვეშინოდა, რადგან ვიცოდით, ეს არბიტრი ვინ იყო“.
Lionel Messi: "No quiero hablar del árbitro, porque te sancionan, no podés decir lo que pensás. La FIFA tiene que reveer eso, no puede ponerlo en una instancia así, QUE EL ARBITRO NO ESTÉ A LA ALTURA". pic.twitter.com/FFiT4OGCJO
— TyC Sports (@TyCSports) December 9, 2022
შეგახსენებთ, რომ ნიდერლანდებისა და არგენტინის ნაკრებების მატჩის ძირითადი დრო ფრედ, 2:2 დასრულდა. თერთმეტმეტრიანების სერიაში „ალბისელესტეს“ გმირად ემილიანო მარტინესი მოევლინა და „ნარინჯისფრების“ ორი პენალტი მოიგერია, რითიც გუნდი ნახევარფინალში გაიყვანა.
