ევროკავშირის რეზოლუცია - კომპენსაცია მიგრანტების ოჯახებს და LGBTQ+ თემის მხარდაჭერა

ევროკავშირის პარლამენტმა მხარი დაუჭირა რეზოლუციას, რომლის მიხედვითაც, კატარში დაღუპული მიგრანტების ოჯახებმა კომპენსაცია უნდა მიიღონ. ევროკავშირის წარმომადგენლების მიხედვით, თანხის გადახდა თავზე ფიფამ უნდა აიღოს.

კომპენსაციის გარდა, ევროკავშირმა კატარის მმართველებს მოუწოდა, გამოძიება ჩაატაროს, რომლის მიზანიც ადამიანის უფლებების დარღვევის ფაქტების გამოვლინება იქნება. საუბარი ეხება, როგორც LGBTQ+ თემის წარმომადგენლებს, ისე მიგრანტებს. საინტერესოა, რომ ევროკავშირი კატარს ერთსქესიანთა ურთიერთობის დეკრიმინალიზაციასაც სთხოვს.

შეგახსენებთ, რომ გუშინ, ბრაზილიელმა ჟურნალისტმა, ვიქტორ პერეირამ განაცხადა, რომ სტადიონის დატოვებისას მას ბრაზილიის შტატის, პერნამბუკუს დროშა ჰქონდა, რომელიც წაართვეს, რადგან LGBTQ+ დროშა ეგონათ.

ცნობისთვის, კატარის გარშემო კიდევ ერთი სკანდალია აგორებული, რომელიც ბელგიის ნაკრების სათამაშო ფორმას უკავშირდება. „წითელი ეშმაკები“ საგარეო მაისურებით ვერ იასპარეზებენ, რადგან მასზე სიტყვა „სიყვარულია“ გამოსახული. ფიფამ ბელგიელებს განუცხადა, რომ თუ ამ მაისურის გამოყენება უნდათ, ეს სიტყვა უნდა მოაშორონ ან დაფარონ. გავრცელებული ინფორმაციით, ბელგიის ნაკრები ჯგუფური ეტაპის ყველა შეხვედრას წითელი ფერის მაისურებით გამართავს და შემდეგ გადაწყვეტს, რა მოიმოქმედოს. ამასთან, ფიფას პრობლემა აქვს მაისურებზე, რომლებიც ბელგიელებს გახურებისას აცვიათ, რადგან იგი ძალიან „ფერადია“.