სადებიუტო გოლი ბარსასთან - მანაგაძემ კატალონიურ დერბიში გაიტანა
ესპანეთის 19-წლამდე საფეხბურთო ჩემპიონატში „ჟირონას“ ფორვარდმა ლუკა მანაგაძემ კატალონიურ დერბიში „ბარსელონას“ 19-წლამდე გუნდს გაუტანა.
18 წლის ქართველი თავდამსხმელი სათადარიგოთა სკამზე იჯდა, 69-ე წუთზე თამაშში ჩაერთო, გოლი მეორე დამატებულ წუთზე შეაგდო, მცველს პოზიციური ბრძოლა მოუგო და ესპანეთის 19-წლამდე ნაკრების მეკარეს, ანდერ ასტრალაგას ახლო მანძილიდან გაუტანა.
მე-4 დამატებულ წუთზე „ბარსამ“ ორბურთიანი უპირატესობა აღადგინა და 3:1 მოიგო. შეხვედრა „ლა მასიას“ აკადემიაში გაიმართა.
აღნიშნულ შეხვედრაში „ბარსას“ წინააღმდეგ კიდევ ერთი ქართული გვარის მქონე ფეხბურთელმა, ანტალ იააკობიშვილმა ითამაშა, რომელიც უნგრეთის მოქალაქეა და უნგრეთის ასაკობრივ ნაკრებში თამაშობს.
ესპანეთის 19-წლამდე ჩემპიონატის (División de Honor) მე-3 ჯგუფში „სარაგოსა“ 20 ქულით პირველ ადგილზეა, „ბარსას“ აქტივში 19 ქულაა, ხოლო „ჟირონამ“ 5 ქულა დააგროვა.
ლუკა მანაგაძე ესპანურ „მარსეტის“ აკადემიაში ირიცხებოდა, „ჟირონაში“ გადასვლამდე „ხიმნასტიკ მანრესაში“ თამაშობდა, მიმდინარე სეზონის დასაწყისში კატალონიურ კლუბს შეუერთდა და „ჟირონას“ 19-წლამდე გუნდში ასპარეზობს. ეს მისი სადებიუტო გოლია „ჟირონას“ 19-წლამდე გუნდში.
მანაგაძე პერიოდულად „ჟირონას“ მეორე გუნდთან ერთად ვარჯიშობს და სადებიუტო შეხვედრაც ჩაატარა. მიმდინარე სეზონის დასაწყისში ფეხბურთელმა „ჟირონასთან“ სამწლიანი კონტრაქტი გააფორმა.
