გოჩოლეიშვილს ახალი მსურველი ჰყავს - მისით იტალიური გრანდი ინტერესდება

„საბურთალოს“ ქართველი ფეხბურთელი, გიორგი გოჩოლეიშვილი უცხოური კლუბების რადარზე იმყოფება. ესპანური გამოცემები მას „ვალენსიას“ უკავშირებდნენ, რამდენიმე საათის წინ კი, ტურინის „იუვენტუსის“ ვარიანტი გაჟღერდა.

„ჩვენ მიერ მოპოვებული ინფორმაციით, ვალენსიას მეკარის, გიორგი მამარდაშვილის გარდა, იუვენტუსი გიორგი გოჩოლეიშვილს აკვირდება. ახალგაზრდა ქართველი ფლანგის მცველი საბურთალოს რიგებში თამაშობს, სადაც ძირითადი შემადგენლობის უცვლელი წევრია და შესაძლოა, ტურინში ერთი მილიონი ევროს სანაცვლოდ გადმოვიდეს. გოჩოლეიშვილი ვალენსიასაც მოსწონს და მისი ტრანსფერი ნებისმიერი კლუბისთვის შესანიშნავი გარიგება იქნება“, - წერს TuttoJuve.com-ი.

შეგახსენებთ, რომ 21 წლის გიორგი გოჩოლეიშვილი „საბურთალოს“ აკადემიის აღზრდილია და ამავე კლუბის მთავარ შემადგენლობაში 2020 წლიდან გამოდის. ახალგაზრდა ფეხბურთელს თბილისური გუნდში 84 შეხვედრა აქვს ჩატარებული, სადაც 8 გოლი გაიტანა და 12 საგოლე გადაცემა შეასრულა. Transfermarkt-ზე ქართველი ფეხბურთელი 600 ათას ევროდ არის შეფასებული.

„ვალენსიას“ რაც შეეხება, „საბურთალოსთან“ დაკავშირებულმა წყარომ, რომელმაც ანონიმურად დარჩენა ისურვა, Efe-ს განუცხადა, რომ გიორგი შესაძლოა, „ღამურებს“ წლის ბოლომდე შეუერთდეს. ამავე წყაროს მიხედვით, „ვალენსიას“ წარმომადგენელი, სერხიო ჩულვი აგილარი „საბურთალოს“ ნიჭიერ ფეხბურთელებს აკვირდება.