ძოლა ხვიჩაზე: „ინგლისში მასზე ბევრს საუბრობენ, ერთ-ერთი საუკეთესო ტალანტია“

ლეგენდარულმა იტალიელმა ფეხბურთელმა, ჯანფრანკო ძოლამ ხვიჩა კვარაცხელიაზე ისაუბრა. „ნაპოლისა“ და „ჩელსის“ ყოფილმა შემტევმა სერია A-ს ოფიციალურ არხს ინტერვიუ მისცა და ქართველი ახალგაზრდა შეაქო.

„კვარაცხელიას შესახებ არაფერი ვიცოდი და როცა მისი თამაში პირველად ვნახე, გაოცებული დავრჩი. პირველი, რაც ხვიჩას თამაშისას თვალში გხვდება, ბურთის კონტროლის, მეტოქის მარტივად ჩამოშორებისა და ზუსტი პასების გაკეთების უნარია, თუმცა მას შესანიშნავი საფეხბურთო ინტელექტიც აქვს და სწორ მომენტში ყოველთვის სწორ გადაწყვეტილებას იღებს. იგი ერთ-ერთი საუკეთესო ტალანტია, ვინც ბოლო პერიოდში მინახავს და ნაპოლის მის აღმოჩენას ვულოცავ.

რომასთან მატჩს რაც შეეხება, კვარას შესანიშნავი უნარები აქვს და მიუხედავად იმისა, რომ ძალიან ცოტა სივრცე მიიღო, მნიშვნელოვანი ქმედებები მაინც შემოგვთავაზა. აქ, ინგლისში, მასზე ბევრს საუბრობენ და ბევრი კლუბის ყურადღება მიიპყრო“.

შეგახსენებთ, რომ „ნაპოლიმ“ მინიმალური სხვაობით იმარჯვა და ზედიზედ მე-11 მატჩი მოიგო. „პარტენოპეის“ 29 ქულა აქვს და სატურნირო ცხრილის ლიდერია. ნეაპოლელთა მომდევნო გაჩერება ჩემპიონთა ლიგაა, სადაც „რეინჯერსს“ დაუპირისპირდებიან.