დელ პიერო ხვიჩაზე: მას აქვს ძრავა, ტექნიკა, გამბედაობა... შთამბეჭდავი ფეხბურთელია

ტურინირს „იუვენტუსის“ ლეგენდარულმა ფეხბურთელმა, ალესანდრო დელ პიერომ Sky Club-თან ინტერვიუს დროს ხვიჩა კვარაცხელიას შესახებ ისაუბრა.

იტალიელმა ლეგენდამ კვარას შესახებ საქებარი სიტყვები არ დაიშურა და განაცხადა, რომ ქართველი ფეხბურთელი „ნაპოლის“ თამაშზე დიდ გავლენას ახდენს.

რა თქვა დელ პიერომ:

„ნაპოლიმ“ ზაფხულის სატრანსფერო ბაზარზე კარგად იმუშავა, სპალეტის მითითებები ნათელი იყო და ხელმძღვანელებმა ეს გაითვალისწინეს. კლუბის მიერ მოძიებულმა მოთამაშეებმა „ნაპოლის“ თამაშზე გიჟური გავლენა მოახდინეს. მათ დაიმატეს ჯერ ანგისა, შემდეგ კი კვარაცხელია, რომელიც შთამბეჭდავი ფეხბურთელია. ის ყოველთვის მიდის მეტოქეზე და მის მოტყუებას ახერხებს, აქვს შესანიშნავი დრიბლინგი და თვისებები. ამას პოლიტანოც ხშირად აკეთებს, ისევე, როგორც აკეთებდა ინსინიე, მაგრამ ეს ბიჭი ყოველთვის წინ, პირდაპირ მიდის. კვარას აქვს ძრავა, ტექნიკა, გამბედაობა... ის მართლაც წარმოუდგენელ რაღაცეებს აკეთებს და ვიმედოვნებ, რომ ეს ბოლომდე ასე გაგრძელდება, რადგან „ნაპოლის“ თამაშის ყურება დიდ სიამოვნებას მანიჭებს. როცა განკარგულებაში ასეთი მოთამაშე გყავს, შენ ყოველთვის გექნება უპირატესობა. ის არღვევს დაცვას და შემდეგ, მთელი გუნდი აცნობიერებს, რომ მათ ხელში დიდი იარაღია. სპალეტის გუნდები ყოველთვის კარგად თამაშობენ, რადგან ის მოთამაშეებს ყოველთვის აძლევს საკუთარი თავის საუკეთესოდ წარმოჩენის შესაძლებლობას.

შეგახსენებთ, რომ ხვიჩამ „ნაპოლის“ მაისურით მიმდინარე სეზონში ყველა ტურნირზე 10 მატჩი ჩაატარა, სადაც 5 გოლი გაიტანა და 3 საგოლე გადაცემა შეასრულა. სპალეტის გუნდი სერია A-ს სატურნირო ცხრილს „ატალანტასთან“ ერთად 20 ქულით ლიდერობს.

ნეაპოლიტანური გუნდი მომდევნო შეხვედრას ამჯერად ჩემპიონთა ლიგაზე გამართავს. კვარაცხელიას გუნდის მეტოქე 4 ოქტომბერს „აიაქსი“ იქნება. მატჩი ამსტერდამში, საქართველოს დროით 23:00 საათზე დაიწყება.