“მესის ადგილას ამით უკვე დავიღლებოდი“ - პეტი მბაპეს აკრიტიკებს

1998 წლის მსოფლიო ჩემპიონმა ემანუელ პეტიმ კილიან მბაპე პრესაში გაკეთებული განცხადებების გამო გააკრიტიკა.

რამდენიმე დღის წინ კილიანმა განაცხადა, რომ ნაკრებში უფრო მეტი თავისუფლება აქვს, მოედანზე თავს მეტად კომფორტულად გრძნობს, ვიდრე პსჟ-ში.

„ნაკრებში სხვანაირად ვთამაშობ, აქ ჩემგან სხვა რაღაცებს ითხოვენ. აქ გაცილებით მეტი თავისუფლება მაქვს, ვიდრე კლუბში.

დიდიე დეშამმა იცის, რომ ჩვენ გვყავს ოლივიე ჟირუს მსგავსი ცხრა ნომერი - ის მცველებს ზურგს უკან თამაშობს. და მე შემიძლია გადაადგილება სხვადასხვა მიმართულებით, ვეძებ თავისუფალ სივრცეს, ვითხოვ ბურთს. პსჟ-ში სხვაგვარადაა, მე მთხოვენ გალტიეს წამყვანი წერტილი ვიყო, ეს სხვა რამ არის“.

- თქვა მბაპემ.

პეტი მიიჩნევს, რომ მბაპეს გაჩერების დროა:

„ეს ყველაფერი ერთი და იგივე მოთამაშის გარშემო ტრიალებს. მისი გაჩერების დროა. მბაპე ჭკვიანია, მან უნდა იცოდეს მისი სიტყვების შედეგები. არსებობს ბუმერანგის ეფექტი. უთხარი შენს მწვრთნელს ამის შესახებ, პირადად.

ეს ეხება გუნდს და ეს ყველაფერი მას საჯარო სივრცეში გამოაქვს. მესის და კომპანიის ადგილას ამით უკვე დავიღლებოდი.

შემდეგი ნაბიჯი იქნება, რომ მბაპეს ჰკითხონ, როგორი გუნდის ნახვას ისურვებდა მის გარშემო. დიახ, ეს იქნება შემდეგი ნაბიჯი“,

- განუცხადა პეტიმ RMC Sport-ს.