GOAL: მესის ბარსაში დაბრუნება თავისუფლად არის შესაძლებელი

ავტორიტეტული გამოცემა GOAL საინტერესო ინფორმაციას ავრცელებს. „ბარსელონას“ ვიცე-პრეზიდენტმა ედუარდ რომეუმ განაცხადა, რომ ლეო მესის მომავალ სეზონში დაბრუნება სავსებით შესაძლებელია.

ჯერჯერობით თავად არგენტინელ სუპერვარსკვლავს თავის მომავალზე განცხადება არ გაუკეთებია. მესის მთავარი პრიორიტეტი ახლა მსოფლიო ჩემპიონატია, მაგრამ იზრდება ვარაუდი, რომ ის შესაძლოა შემდეგ სეზონში „კამპ ნოუზე“ დაბრუნდეს.

რა თქვა რომეუმ?

„ფინანსურად მესის დაბრუნება შესაძლებელი იქნება, რადგან თუ ის ამას გადაწყვეტს თავისუფალი აგენტის სტატუსით გადმოვა. ეს არის გადაწყვეტილება, რომელიც ფეხბურთელმა და სამწვრთნელო შტაბმა ერთობლივად უნდა მიიღონ. ამ ყველაფერს მე ვერ გადავწყვეტ და ჩემზე არ არის დამოკიდებული, მაგრამ გამორიცხული არაფერია."

შეგახსენებთ, რომ ლეო მესის „პარი სენ ჟერმენთან“ კონტრაქტი 2023 წლის ივნისში ეწურება. სურვილის შემთხვევაში, ვეტერან არგენტინელს საფრანგეთის დედაქალაქში გაჩერება კიდევ 1 წლით შეეძლება.

მესი პსჟ-ში

არგენტინელი სუპერვარსკვლავი პარიზულ კლუბს 2021 წლის ზაფხულში შეუერთდა. 2021 წლიდან დღემდე, მესიმ „პარი სენ ჟერმენის“ მაისური ყველა ტურნირზე ერთად 45-ჯერ მოირგო, 17 გოლი გაიტანა და 23 საგოლე გადაცემა შეასრულა.