2-თვიანი უქმობა, თუ მსოფლიო ჩემპიონატის გამოტოვება? არაუხოს არასახარბიელო ვარიანტები

სანაკრებო პაუზისას „ბარსელონამ“ ერთბაშად 4 მოთამაშე დაკარგა. მემფის დეპაიმ, ფრენკი დე იონგმა, ჟიულ კუნდემ და რონალდ არაუხომ ტრავმები მიიღეს.

დე იონგი და დეპაი 7-10 დღეს იუქმებენ, კუნდე დაახლოებით 2-3 კვირას, ხოლო არაუხოს მდგომარეობა გაცილებით მძიმეა.

ექიმები ურუგვაელს ოპერაციას სთავაზობენ, რომ რისკები თავიდან აირიდონ, თუმცა ასეთ შემთხვევაში ფეხბურთელს მსოფლიო ჩემპიონატის გამოტოვება მოუწევს, რაც მის გეგმებში არ შედის.

ჯერჯერობით არაუხოს გადაწყვეტილება საბოლოოდ არ მიუღია და რამდენიმე დღე ფიქრს აპირებს.

ურუგვაელი ორშაბათს „ბარსელონას“ სამწვრთნელო შტაბს და ექიმებს შეხვდება, რის შემდეგაც საბოლოო გადაწყვეტილებას მიიღებს.

ოპერაციის გარეშე ის მოედანს 6-8 კვირაში დაუბრუნდება. As-ის ცნობით, ფეხბურთელს ეჭვი ეპარება, რომ მკურნალობა მას საბოლოოდ გამოჯანმრთელების საშუალებას მისცემს. აშკარაა, რომ ოპერაცია უკეთესი ვარიანტია, მაგრამ მსოფლიო ჩემპიონატზე უარის თქმა რთული რამ არის.

წყაროს ცნობით, არაუხოს არ უნდა, რომ უმტიტისა და ფატის გზას დაადგეს და მათი შეცდომები გაიმეოროს, როცა ორივე მათგანმა მედშტაბს არ მოუსმინა და საკმაოდ დიდი ხნის გამოტოვება მოუხდათ, რამაც მათ კარიერას დაღი დაასვა.