ნუგზარ წურწუმია მსოფლიოს ვიცე-ჩემპიონია
სერბეთის დედაქალაქ ბელგრადში მიმდინარე ბერძნულ-რომაული სტილით მოჭიდავეთა მსოფლიო ჩემპიონატზე საქართველოს დელეგაციამ პირველი ვერცხლის მედალი მოიპოვა.
55 კგ. წონით კატეგორიაში მოასპარეზე ნუგზარ წურწუმია ტურნირის ფინალში აზერბაიჯანელ ელდანიზ აზიზლის შეხვდა და სამწუხაროდ უშანსოდ, პირველივე პერიოდში 8:0 დამარცხდა.
ფინალამდე წურწუმიამ პირველ წრეში იორდანელ მოსტაფა სულთან რაიექ ალქადეს ბარიერი დაძლია, 1/4-ფინალში უზბეკი იასურბეკ ორტიკბოევი მძიმე ბრძოლაში 5:2 დაამარცხა. ნახევარფინალში, კი ქართველმა მოჭიდავემ ყაზახი ამანგალი ბეკბოლატოვი დაამარცხა.
შეგახსენებთ, რომ მსოფლიო ჩემპიონატზე ოქროს მედლის მოპოვების შანსი კიდევ ერთ ქართველ მოჭიდავეს აქვს. ხვალ, საქართველოს დროით 20:00 საათიდან ლერი აბულაძე მსოფლიო პირველობის ფინალში მასპინძელი სერბეთის წარმომადგენელს, სებასტიან ნადის შეხვდება.
