,,არ ვარ სკამზე ჩაბღაუჭებული“ - ფიფიამ ბევრ თემაზე ისაუბრა

საფეხბურთო კლუბმა თბილისის ''დინამომ'' კლუბის პრეზიდენტის, რომან ფიფიას ინტერვიუ გამოაქვეყნა. რომან ფიფიას თქმით, კლუბის გასხვისებასთან ან პარტნიორობასთან დაკავშირებით დაინტერესებულ მხარეებთან მოლაპარაკებები მიმდინარეობს, თუმცა კონკრეტული გადაწყვეტილება არ მიღებულა.

ფიფიამ სხვა თემებზეც ისაუბრა, მათ შორის რუსთავის ''აზოტთან'' დაკავშირებით, რომელიც მისი თქმით, გარკვეულმა ჯგუფებმა უსამართლოდ წაართვეს.

''რამდენიმე გამოხატული ინტერესი არის. მიმდინარეობს მოლაპარაკება, როგორც კლუბის მთლიანად გაყიდვასთან, ასევე პარტნიორობასთან დაკავშირებით. საქართველოდან ინტერესი არავის გამოუხატავს, ინტერესი არც იმ ხალხისგან ყოფილა, ვისაც ''დინამოში'' ინვესტიციის ჩადება შეუძლიათ, რომ ''დინამო'' სხვა ეტაპზე გაიყვანონ.

''ევროტურნირებზე თბილისის ''დინამოს'' გამოსვლამ დამანახა, რომ სახსრები, რაც შემიძლია ''დინამოსთვის'' დავხარჯო, საკმარისი არაა. ვგრძნობ პასუხისმგებლობას, ეს არ არის კომერციული ობიექტი, რომ როგორც გინდა მოეპყრო.

2011 წლიდან თბილისის ''დინამო'' ძალიან განვითარდა, ინფრასტრუქტურულად ასეთი განვითარება არასდროს ყოფილა. 

ფინანსებია მთავარი. ეს სჭირდება ქართულ ფეხბურთსა და თბილისის ''დინამოს''. კარგი იქნება, თუ ეს ადამიანი ჩვენი ქვეყნიდან იქნება, თუნდაც ემიგრანტი იყოს.

მე არ ვარ სკამზე ჩაბღაუჭებული. თუ მზადყოფნა არის, მზად ვარ წინადადებები განვიხილო.

თბილისის ''დინამო'' ჯგუფურ ეტაპზე მოხვდებოდა, თუმცა ერთმა ჯგუფმა (შესაძლოა, ორმაც) რუსთავის ''აზოტი'' უსამართლოდ მიითვისა. მე სამართლებრივ პროცესებში ვარ ჩართული. 2015 წლიდან საქართველოში ბიზნესი არ მაქვს, თუმცა რაც შემიძლია, ''დინამოს'' ყველაფერს ვუკეთებ''.