Talksport: „მანჩესტერი მზადაა რონალდუს თაობაზე წინადადებები განიხილოს“
ბრიტანული რადიო, Talksport-ი საკუთარ ვებგვერდზე სტატიას აქვეყნებს და კრიშტიანუ რონალდუს შესახებ გვესაუბრება. პორტუგალიელ ფეხბურთელზე ყოველდღე ახალი ინფორმაცია ვრცელდება და მის წასვლაზე აქტიურად იწერება.
TalkSport-ის ცნობით, „წითელმა ეშმაკებმა“ პოზიცია შეცვალეს და მზად არიან, რონალდუს ტრანსფერის თაობაზე წინადადებები მოისმინონ. აქამდე, ბრიტანულ პრესაში აცხადებდნენ, რომ კლუბს ერთ-ერთი ლიდერის გაშვება არ სურდა, მაგრამ დღესდღეობით სხვანაირი სურათი გვაქვს.
შეგახსენებთ, რომ ამ ეტაპზე, რონალდუს გადაბირების ერთადერთი რეალური კანდიდატი „ატლეტიკოა“. AS-ის მიხედვით, დიეგო სიმეონეს პორტუგალიელი ფეხბურთელის საკუთარი გუნდის რიგებში ხილვა სურს, მაგრამ „როხიბლანკოს“ ფინანსური მდგომარეობიდან გამომდინარე, ამ ტრანსფერის გაჩარხვა ძალიან ძნელია.
ცნობისთვის, Sky Sports-ისა და Times-ის ინფორმაციით, „მანჩესტერის“ ხელმძღვანელებსა და სამწვრთნელო შტაბის წევრებს სურთ, რონალდუმ დამოკიდებულება შეცვალოს და მთელი ყურადღება გუნდზე გადაიტანოს. თუ ასე არ მოხდა, „ოცნებათა თეატრზე“ მასთან კონტრაქტის გაწყვეტასაც განიხილავენ.
