„ჯადოქრობა მოედანზე“ - ნაპოლი კვარაცხელიას ვიდეოს აქვეყნებს
ორშაბათს, საქართველოს ნაკრების ფეხბურთელი, ხვიჩა კვარაცხელია „ნაპოლიში“ პირველ ოფიციალურ შეხვედრას გამართავს. ლუჩიანო სპალეტის გუნდი სერია A-ს პირველ ტურში სტუმრად „ვერონას“ დაუპირისპირდება.
ნეაპოლურმა გუნდმა წინასასეზონო მზადება დაასრულა და პირველი ტურის შეხვედრისთვის აქტიურად ემზადება. გუშინ, „ნაპოლის“ ოფიციალურ Twitter-ის გვერდზე წინასასეზონო შეკრებიდან ხვიჩა კვარაცხელიას საუკეთესო მომენტების კრებული გამოქვეყნდა, წარწერით: „პარასკევის გრძნობა: ჯადოქრობა მოედანზე“.
Friday Feeling: Scende in campo la Magia. ✨
— Official SSC Napoli (@sscnapoli) August 12, 2022
Goditi il tuo weekend con @CocaColaIT ! ????#cocacola #realmagic #fridayfeeling pic.twitter.com/DJphF4MDr0
ამ პოსტის შემდეგ, კლუბთან დაახლოებულმა სააგენტომ Calcionapoli1926-მა დაწერა, რომ „ნაპოლის“ ამხანაგურ შეხვედრებში ყველაზე პროდუქტიულად თავი ქართველმა ფეხბურთელმა წარმოაჩინა და ახალი სეზონიდან ხვიჩა გუნდის საყრდენი ძალა იქნება.
რას წერს Calcionapoli1926:
Twitter-ზე გამოქვეყნებული პოსტით, „ნაპოლიმ“ წინასასეზონო თამაშების გამო კვარაცხელიას პატივი მიაგო. ფაქტობრივად, ქართველი გარემარბი ლუჩიანო სპალეტის გუნდში ერთ-ერთი საუკეთესო იყო თავისი გოლებით, პასებით და მისი სტილისთვის დამახასიათებელი თამაშით.
ცნობისთვის, ხვიჩამ კლუბის წინასასეზონო შეკრებაზე 6 შეხვედრაში მიიღო მონაწილეობა, რომელშიც 4 გოლი გაიტანა და 1 საგოლე გადაცემა შეასრულა.
შეგახსენებთ, რომ „ნაპოლი“ სერია A-ს ახალ სეზონში პირველ შეხვედრას 15 აგვისტოს, სტუმრად „ვერონას“ წინააღმდეგ გამართავს. მატჩი საქართველოს დროით 20:30 საათზე დაიწყება.
