„ლა ლა ლა ვლადიმერ პუტინ“ - ფენერბახჩეს ქომაგები კიევის დინამოსთან მატჩისას

„ფენერბაჰჩეს“ გულშემატკივრებმა რუსეთის პრეზიდენტის ვლადიმერ პუტინის სახელის სკანდირება დაიწყეს.

თურქული გუნდი ჩემპიონთა ლიგის მე-2 საკვალიფიკაციო ეტაპზე კიევის „დინამოს“ მასპინძლობდა. „ფენერი“ 0:1-ს აგებდა და თან მოედანზე კაცნაკლული იყო.

57-ე წუთზე ვიტალი ბუალსკიმ ანგარიში გახსნა და გოლი მასპინძელთა ქომაგების თვალწინ გამომწვევად აღნიშნა, რასაც თურქი გულშემატკივრების მხრიდან ვლადიმერ პუტინის სახელის სკანდირება მოჰყვა: „ლა ლა ლა, ვლადიმერ პუტინ!“ - მღეროდნენ ქომაგები.

ამ ჟესტით თურქმა ქომაგებმა უკრაინელებს შეურაცხყოფა მიაყენეს.

89-ე წუთზე ატილა შალაიმ ანგარიში გაათანაბრა და მატჩი დამატებით დროში გადავიდა.

საბოლოოდ, მატჩი დამატებით დროში კიევის „დინამოს“ გამარჯვებით 2:1 დასრულდა და მომდევნო ეტაპზე უკრაინული კლუბი გავიდა.

შეხვედრის შემდეგ, „დინამოს“ მთავარი მწვრთნელი მირჩა ლუჩესკუ პროტესტის ნიშნად პრესკონფერენციაზე არ გამოცხადდა. რა თქმა უნდა, ეს „ფენერბახჩეს“ ქომაგების საქციელის გამო მოხდა.