„ბედნიერი ვარ და ეს დიდი პატივია" - მაჰრეზი სიტიში 2025 წლის ზაფხულამდე დარჩება
„მანჩესტერ სიტის“ ფეხბურთელმა, რიად მაჰრეზმა „ქალაქელებთან“ კონტრაქტი გაახანაგრძლივა. 31 წლის გარემარბმა კლუბს საკუთარი მომავალი 2025 წლის ივნისამდე დაუკავშირა და განაცხადა, რომ „სიტისთან“ ერთად უფრო დიდი წარმატების მიღწევა სურს.
???? @Mahrez22 ????#ManCity pic.twitter.com/zEH2F912d8
— Manchester City (@ManCity) July 15, 2022
„ძალიან ბედნიერი ვარ, ახალი კონტრაქტი რომ გავაფორმე. სიტიში გატარებული თითოეული წუთი ჩემთვის სასიამოვნო იყო და დიდი პატივია, ასეთი საოცარი კლუბის წევრი რომ ვარ. ჩემთვის დაუვიწყარი გახლდათ, ბოლო 4 სეზონის განმავლობაში მიღწეულ წარმატებაში ჩემი წვლილი რომ შევიტანე და უფრო მეტის მიღწევას ვარ მოწყურებული.
მინდა, პეპ გუარდიოლასა და კლუბის სამწვრთნელო შტაბს მადლობა გადავუხადო. ისინი პროგრესის მიღწევაში დამეხმარნენ და მიბიძგებენ, რომ წინსვლა განვაგრძო. ახლა, მინდა, ვცადო, რომ მომავალში გუნდის წარმატებაში უფრო დიდი წვლილი შევიტანო“.
შეგახსენებთ, რომ 31 წლის ფეხბურთელს „სიტის“ მაისურით 189 შეხვედრა აქვს ჩატარებული. მის ანგარიშზე 63 გოლი და 45 შედეგიანი გადაცემაა.
