„მშვიდი და თავმდაბალი ბიჭია, იტალიურის სწავლა დაიწყო" - ხვიჩას აგენტის ინტერვიუ
ხვიჩა კვარაცხელიას ერთ-ერთმა აგენტმა, ჯენარო დი ნარდომ, რომელიც „კვარას“ ტრანსფერზე კრისტიან ძაკარდოსთან ერთად მუშაობდა, ქართველ ფეხბურთელზე ისაუბრა. დი ნარდომ AreaNapoli-ს ექსკლუზიური ინტერვიუ მისცა და ბევრ საინტერესო თემაზე ისაუბრა.
ტრანსფერი და ნაპოლის პოზიცია
„მე და ძაკარდო ტრანსფერზე დიდი ხნის განმავლობაში ვმუშაობდით. ჩვენთვის პატივია, ნიჭიერი ფეხბურთელი ნაპოლიში რომ გადმოვიყვანეთ და დარწმუნებული ვართ, ის თავის დიად პოტენციალს ბოლომდე გამოიყენებს“.
გუშინდელი ამხანაგური მატჩი და რთული მეტოქეები
„გუშინდელ ამხანაგურ შეხვედრას ვუყურე და ხვიჩამ ძალიან კარგად ითამაშა. იმ მატჩში მისი საფეხბურთო შესაძლებლობების მხოლოდ მცირე ნაწილი დავინახეთ და კვარაცხელია არის ფეხბურთელი, რომელსაც თავის გამოჩენა ნებისმიერ მეტოქესთან შეუძლია“.
ვინ აღმოაჩინა კვარა
„ხვიჩა კრისტიან ძაკარდომ აღმოაჩინა, მისი ქართველი აგენტი კი მამუკა ჯუღელი გახლავთ. კვარაცხელიას შესახებ ინფორმაცია ორი წელია გვაქვს. ძაკარდომ უდიდესი და უმნიშვნელოვანესი სამუშაო გასწია და ნაპოლიმ, კრისტიანო ჯუნტოლისა და მაურიციო მიჩელის სახით, ჩვენი ბიჭის ირწმუნა. იმედი მაქვს, იგი წარმატებას მიაღწევს“.
ხვიჩას მსურველები
„შემიძლია, გითხრათ, რომ ფაბიო პარატიჩი მისი ერთ-ერთი თაყვანისმცემელი გახლდათ. იყო სხვა კლუბების ინტერესებიც, მაგრამ გადამწყვეტი ფეხბურთელისა და მამუკას სურვილი აღმოჩნდა. ნაპოლი ნომერ პირველი არჩევანი იყო. მთავარმა მწვრთნელმა და ხვიჩამ იციან, ნეაპოლში რის გაკეთება შეუძლიათ და იღბლის წყალობით, ყველაფერმა კარგად ჩაიარა“.
ნაპოლის ინვესტიცია და სატრანსფერო თანხა
„ნაპოლის ხვიჩასი ისე სჯერა, რომ ამდენად მნიშვნელოვანი ინვესტიციის განხორციელება გადაწყვიტა. დაჯდა თუ არა ტრანსფერი ნამდვილად 10 მილიონი? ზუსტი რიცხვები ბოლომდე არაა გასაჯაროებული, თუმცა ნაპოლის ინვესტიცია პატარა ნამდვილად არ ყოფილა. თანაც ასეთ რთულ პერიოდში, როცა პანდემიის გამო, ყველაფერი მძიმედაა.
რას შესძენს ნაპოლის ადამიანური გადმოსახედიდან
„ხვიჩა ძალიან თავმდაბალი და წარმატებას მოწყურებული ადამიანია. ის, როგორც მოედანზე, ისე მის მიღმა სხვების დასახმარებლად ყოველთვის მზადაა. კვარა ჩუმი ბიჭია და იტალიურის სწავლა დაწყებული აქვს. იგი ნაპოლიზეა ორიენტირებული და აქ იმიტომ ჩამოვიდა, რომ ფეხბურთი ითამაშოს. ვიცით, ეს მარტივი არ იქნება, მაგრამ მას სურს, მაქსიმუმი გაიღოს და ყველაფერს გავაკეთებთ, რათა თავი კარგად იგრძნოს“.
თუ შევა ნაპოლის ქომაგთა გულებში ისე, როგორც ეს ლავეციმ გააკეთა
„კვარაცხელია არის ფეხბურთელი, რომელსაც დრიბლინგი ძალიან უყვარს და წარმატებული დრიბლინგის მაღალი პროცენტი აქვს. გამომდინარე იქიდან, რომ მეტოქის მოტყუებას ხშირად ცდილობს, შეგვიძლია, მივხვდეთ თუ რამდენად გამბედავი და მამაცია. კვარა არის ფეხბურთელი, რომელიც ყოველთვის მაქსიმუმს აკეთებს და თანაგუნდელებს ეხმარება. მას შეტევის გარდა, უკან დახევა და დაცვაში თამაშიც გამოსდის და კარგი ფიზიკური კონდიციები, ძლიერი დარტყმა და სიჩქარე აქვს. მისი ხასიათის გამო, იგი ქომაგებთან კარგ ურთიერთობას აუცილებლად დაამყარებს“.
კვარას შთაბეჭდილებები დიმაროში გატარებულ პირველ დღეებზე
„ხვიჩა ბედნიერია, ნაპოლიში რომ ვარჯიშობს. ქალაქი ძალიან მოსწონს და უხარია, ქომაგები რომ ცნობენ. გულშემატკივრებმა არ იციან, რა დაუძახონ, მაგრამ ამაზე ვიმუშავებთ. იგი ენთუზიაზმითაა სავსე და წარმატების მიღწევის სურვილი აქვს. როცა ქალაქში დავდივარ, ისეთი შთაბეჭდილება მრჩება, თითქოს ხვიჩა დიდი ხანია, ნაპოლიში ცხოვრობს. ნუთუ ნეაპოლელი ქართველია?! კვარა ბევრს არ ლაპარაკობს. იგი მშვიდი და თავმდაბალია, მაგრამ ხასიათი ნამდვილად აქვს. კვარაცხელია ძალიან ბედნიერია და იმედი მაქვს, ეს ყველაფერი საკუთარი პოტენციალის გამოყენებაში დაეხმარება“.
