60 მილიონი ფუნტი - რაფინიას ბარსელონაში ორშაბათს ელიან

„ლიდსის“ ბრაზილიელი გარემარბი რაფინია „ბარსელონაში“ გადასვლასთან ახლოსაა.

Goal-ის ცნობით, „ბარსამ“ ინგლისელებს ზუსტად ანალოგიური შეთავაზება გაუკეთეს, რაც „ჩელსის“ ჰქონდა - 60 მილიონი ფუნტი, პლუს ბონუსები. აღსანიშნავია, რომ გასულ კვირას „ლიდსი“ „არისტოკრატთა“ მიერ შეთავაზებულ წინადადებას დათანხმდა, თუმცა ისინი რაფინიამ შეაჩერა, რადგან მისთვის პრიორიტეტს „კამპ ნოუზე“ თამაში წარმოადგენს.

რაფინიასთან პირადი კონტრაქტის პირობები „ბარსამ“ ჯერ კიდევ მაისში შეათანხმა.

დიდი ალბათობით, „ბარსელონა“ მზადაა რამდენიმე წლის განმავლობაში რამდენიმე ეტაპად „ლიდსს“ 60 მილიონი ფუნტი გადაუხადოს.

„ლიდსსა“ და „ბარსას“ შორის მოლაპარაკებები უფრო სწრაფი ტემპით მიმდინარეობს და შეთანხმება სავარაუდოდ მალევე მოხდება. ესპანური Sport-ი წერს, რომ ბრაზილიელ შემტევს ბარსელონაში ორშაბათისთვის ელიან.

რაფინამ და მისმა აგენტმა დეკომ კლუბებს 48 საათი მისცეს გარიგების დასასრულებლად. წინააღმდეგ შემთხვევაში, ისინი ხელახლა დაიწყებენ მოლაპარაკებებს „ჩელსისთან“ პირადი კონტრაქტის პირობებზე.