„მინდა, ოქტაგონზე სექტემბერში დავბრუნდე" - გიგა ჭიკაძემ ბევრ თემაზე ისაუბრა

UFC-ის ქართველმა მებრძოლმა გიგა ჭიკაძემ MmaJunkie-ს ვრცელი ინტერვიუ მისცა და ბევრ საინტერესო თემაზე ილაპარაკა.

Forrest Griffin Community Award-ზე, რომელსაც UFC 30 ივნისს გადასცემს

„ეს ჩემთვის და ჩემი ოჯახისთვის ძალიან მნიშვნელოვანი რამაა, რადგან ჩვენ მიერ დაარსებული საქველმოქმედო ორგანიზაცია დედაჩემის ისტორიას გვიყვება. იგი 2013 წელს, სიმსივნით გარდაიცვალა და რამდენიმე წელია ამას ვებრძვით. მისი გარდაცვალება ჩვენი ოჯახისთვის დიდი დარტყმა იყო და მომხდარის შემდეგ გადავწყვიტეთ, დავხმარებოდით ადამიანებს, რომლებსაც სიმსივნესთან ბრძოლა უწევთ. ბევრ ადამიანს დავეხმარეთ და ამით ძალიან ვამაყობთ. გვიხარია, ამ ჯილდოს რომ მივიღებთ და ქველმოქმედებას აუცილებლად გავაგრძელებთ. დიდი ხანი არაა, რაც UFC-ში ვიმყოფები და ჩემთვის ეს უდიდესი პატივია“.

ვოლკანოვსკისა და ჰოლოუეის ბრძოლაზე

„ამ ბრძოლისას პირველ რიგში ვიჯდები და დავაკვირდები, მოვლენები როგორ განვითარდება. ოქტაგონზე ამ დივიზიონის საუკეთესო მებრძოლებს ვნახავთ და მოუთმენლად ველი, ვიხილო, რა მოხდება. ვფიქრობ, მათი ბოლო ბრძოლა მაქსს უნდა მოეგო, მაგრამ მას შემდეგ, ჰოლოუეი აქტიური არ ყოფილა და მხოლოდ 2-ჯერ იჩხუბა. ვოლკანოვსკი კი საუკეთესო მებრძოლების წინააღმდეგ ჩხუბობდა და მისი თითოეული ბრძოლისას გამოჩნდა, რომ მომატებული აქვს. გამომდინარე აქედან, მგონია, ალექსი გაიმარჯვებს, მაგრამ არ გამიკვირდება, მაქსმა ქომაგებს სანახაობა აჩუქოს“.

ოქტაგონზე დაბრუნებაზე

„ტოპ 5-ის მებრძოლებს ვიწვევ და კარიერაში ამხელა პაუზა არასდროს ამიღია, თუმცა ახლა დრო იყო, რომ საკუთარ ჯანმრთელობაზე მეზრუნა და ვნახოთ, რა მოხდება. თქვენ კარგად იცით, ჩხუბი როგორ მიყვარს და მინდა, აქტიური მებრძოლი ვიყო. როგორც კი წონის საკითხს მოვაგვარებ, იხილავთ გიგას, რომელიც თავისი სერიის გაგრძელებას შეეცდება“.

კორეელ ზომბიზე

„ჩემი და ზომბის დაპირისპირება შესანიშნავი ბრძოლა იქნებოდა, რადგან ჩემი ბოლო ჩხუბის შემდეგ, მან ბევრი ილაპარაკა და ბევრი რამ თქვა. მისი ბოლო ასპარეზობის შესახებ არაფერი მითქვამს და ვფიქრობ, მას მაღალი დონე არ უჩვენებია. ალბათ, უკვე ასაკში შევიდა და წარმოდგენა არ მაქვს, რის გაკეთება უნდა. შეიძლება, კარიერის დასრულებაზე ფიქრობს, არ ვიცი. მზად ვარ, ნებისმიერი მეტოქის წინააღმდეგ ვიჩხუბო, რომელთან ბრძოლასაც ჩემთვის აზრი ექნება. ვფიქრობ, სექტემბერი ოქტაგონზე დასაბრუნებლად კარგი დროა. მინდა, ჩხუბს სწორედ სექტემბერში დავუბრუნდე და მანამდე დიდი დრო მექნება, რათა წონის საკითხი მოვაგვარო და ფორმაში შევიდე“.

კატართან ჩხუბზე

„ჩემს ბოლო ბრძოლაში სხვა მიზნებზე ვიყავი კონცენტრირებული. კელვინ კატართან ვჩხუბობდი, მაგრამ სატიტულო ბრძოლაზე ვფიქრობდი. ძალიან გამოცდილი მებრძოლი ვარ და ასეთ შეცდომებს არ უნდა ვუშვებდე, თუმცა ყველაფერი ხდება. მეც ადამიანი ვარ, მთელი ცხოვრება UFC-ის ქამარზე ვოცნებობდი და ამ ბრძოლის შემდეგ, ვიცი, ასეთ მდგომარეობაში აღმოჩენის შემთხვევაში, როგორ უნდა მოვიქცე“.

შეგახსენებთ, რომ კატარისა და ჭიკაძის ბრძოლა იანვარში გაიმართა და მას შემდეგ, „ნინძას“ ვარჯიში აკრძალული ჰქონდა. მძიმე დაზიანებების მიუხედავად, ქართველ მებრძოლს სურს, რომ ოქტაგონზე, რაც შეიძლება, სწრაფად დაბრუნდეს და რამდენჯერმე განაცხადა, რომ „კორეელ ზომბისთან“ ჩხუბი სურს.