"ძალიან გამიმართლა" - ჩუამენი ბენზემას, ანჩელოტის, ფაბრეგასის და მბაპეს შესახებ
ცნობილია, რომ მომავალი სეზონიდან აურელიენ ჩუამენი მომავალი სეზონიდან მადრიდის „რეალში“ ითამაშებს. დღეს, „სამეფო კლუბმა“ ფრანგი ნახევარმცველი წარადგინა, რომელმაც არაერთ საკითხზე ისაუბრა.
ჩუამენი:
„გუნდებს შორის მოლაპარაკების დროს ანჩელოტის ვესაუბრე. ჩვენი დიალოგი სასიამოვნო გამოვიდა. მან მითხრა, რომ თუ გაზრდა და განვითარება მინდა „რეალში“ უნდა გადავსულიყავი. კონტრაქტის გაფორმების შემდეგ მითხრა, რომ ბედნიერი იყო.“
ფაბრეგასი და მისი დახმარება:
„როდესაც „მონაკოში“ გადავედი ვიცოდი, რომ თუ ფაბრეგასთან კარგ ურთიერთობას დავიჭერდი უამრავ რჩევას მომცემდა. მან მასწავლა, რომ, როგორც კი მეტოქეს ბურთს წავართმევ იმ წამსვე წინ წავიდე. მოედნის ხედვა გამიუმჯობესა და ბურთთან ერთად გაცილებით უკეთესი გავხდი. ფაბრეგასმა ჩემი თამაშის ყველა ასპექტი გააძლიერა.“
საყვარელი ფეხბურთელი:
„ზიდანი, როგორც „რეალის“, ასევე ფრანგი გულშემატკივრების სიმბოლოა. ზინედინი 2006 წლის მსოფლიო ჩემპიონატიდან მახსოვს. ის და ბენზემა ჩემი საყვარელი ფეხბურთელები არიან.“
საყვარელი ნომერი:
„8-ნომრიანი მაისურით თამაში მიყვარს, მაგრამ ეს ტონი კროოსს ეკუთვნის. მე 18-ს ვირჩევ, რადგან 8-სთან საკმაოდ ახლოს არის.“
ფული პსჟ-ში, თუ ოცნება „რეალში“:
„როგორც კი „რეალი“ დამიკავშირდა, ჩემს აგენტს ვთხოვე, რომ ტრანსფერისთვის ყველაფერი გაეკეთებინა. იყო სხვა გუნდების ინტერესიც, მაგრამ ჩემი ოცნება აქ თამაში იყო.“
მბაპეს შესახებ:
„კილიანმა პსჟ-ში დარჩენა გადაწყვიტა და ეს მისი არჩევანია. როდესაც გაიგო, რომ „მონაკოს“ დატოვებას ვაპირებდი, დამირეკა და მკითხა მსურდა თუ არა პსჟ-ში წასვლა. მაგრამ მას ვუთხარი, რომ მხოლოდ მადრიდის „რეალში“ მინდოდა თამაში. მან კარგად გამიგო.“
ბენზემა და კამავინგა:
„ძალიან გამიმართლა, რომ კარიმთან და ედუარდოსთან საუბარი შევძელი. კამავინგას შემთხვევაში, ჩვენ ვნახეთ, თუ როგორ განვითარდა ის. ბედნიერი და იღბლიანი ვარ, რომ მსოფლიოს საუკეთესო თავდამსხმელთან ერთად ვითამაშებ. ხელშეკრულების გაფორმების შემდეგ, ბენზემამ დამირეკა და მკითხა მჭირდებოდა, თუ არა რაიმე სახის დახმარება.“
შეგახსენებთ, რომ ფრანგმა ფეხბურთელმა მადრიდის „რეალთან 6-წლიანი კონტრაქტი გააფორმა. „სამეფო კლუბს“ აურელიენ ჩუამენის ტრანსფერი ჯამში 100 მილიონი ევრო დაუჯდა.
